«Sıntetıka» jasaýǵa arnalǵan 72 tonna prekýrsor tárkilendi

ASTANA. QazAqparat – ІІM esirtki qylmysyna qarsy is-qımyl departamenti óndiristik aýqymda sıntetıkalyq esirtki shyǵarý úshin elge prekýrsorlar jetkizýdi jolǵa qoıǵan Qazaqstan men shetel azamattarynan quralǵan transulttyq qylmystyq topty anyqtady, dep habarlaıdy QazAqparat Polisia.kz saıtyna silteme jasap.

Jedel ýákilder zerthanada sıntetıkalyq preparattar shyǵarý úshin qoldanylatyn prekýrsorlardy jetkizý arnalaryn anyqtaý boıynsha arnaıy operatsııalar júrgizdi. Toptyń árbir múshesiniń rólin jáne basqa adamdardyń qatysýyn anyqtaý úshin «arnaıy júk» búkil marshrýt boıy baqylaýda boldy. Oǵan áýe arqyly barlaý da qoldanyldy.

Ótken jyldyń qazan aıynda arnaıy operatsııanyń bastapqy kezeńinde, sondaı-aq bıylǵy naýryzda prekýrsorlardyń kontrabandasyna qatysqan úsh sheteldik azamat elden tys jerlerde ustaldy.

Operatsııanyń sońǵy kezeńinde 21 naýryz kúni Almatyda osy is boıynsha qalǵan fıgýranttar – kórshiles elderdiń eki azamaty jáne qazaqstandyq ustaldy.

Olardan ártúrli salmaqta mefedron, sheteldik polıtsııa qyzmetkeriniń jalǵan kýáligi, zıp-paketter, elektrondy tarazylar, Kalashnıkov avtomatynyń 7,62 mm kalıbrli patrondary tárkilendi.

Qoımalardy tintý barysynda ІІM jáne Almaty qalasy polıtsııa departamentiniń qyzmetkerleri sıntetıkalyq esirtkilerdi daıyndaý úshin qoldanylatyn prekýrsorlardy, sondaı-aq eki reaktordy, ıaǵnı sıntetıkalyq esirtkilerdi daıyndaýǵa arnalǵan arnaıy zerthanalyq jabdyqty tárkiledi.

Tárkilengen prekýrsorlardyń jalpy kólemi – 72,7 tonna. Osylaısha, 8 tonna sıntetıkalyq esirtki óndirýge jol berilmedi. Bul – 8 mıllıon bir rettik doza. Qazirgi ýaqytta tergeý áreketteri júrgizilip jatyr.