Sınoptıkterdiń boljamynsha, Qazaqstannyń ońtústigi men batysynda - tuman, soltústik aımaqtarda boran bolady
ASTANA. Jeltoqsannyń 30-y. QazAqparat - Sınoptıkterdiń sársenbige jasaǵan boljamyna sáıkes, Qazaqstannyń ońtústigi men batysynda tuman saqtalady, al soltústik aımaqtarda boran bolady, qatty jel turady,
dep habarlaıdy Tótenshe jaǵdaılar mınıstrliginen.
Habarlamada naqtylanǵandaı, oblystardyń basym bóligi antıtsıklonnyń ońtústik-batys bóliginiń áserinde, al batys jáne soltústik oblystar atmosferalyq sheptiń aýmaǵynda bolady.
Almaty, Jambyl oblysynyń keı jerlerinde tuman túsedi. Qyzylorda,Qostanaı, Qaraǵandy oblystarynyń da keı aýdandarynda tuman saqtalady, kóktaıǵaq bolady. Ońtústik Qazaqstan oblysynda da tuman bolady, shyǵystan 15-20 metr/sekýnd jyldamdyqpen jel soǵady.
Soltústik Qazaqstan, Aqmola, Shyǵys Qazaqstan oblystarynda, al túnde Pavlodar oblysynda keı jerlerde boran bolady, jeldiń ekpini 15-22 metr/sekýndqa jetedi.
Batys Qazaqstan, Aqtóbe, Mańǵystaý, Atyraý oblystarynda - keı jerlerde tuman, kóktaıǵaq bolady, 15-20 metr/sekýnd jyldamdyqpen jel soǵady.
