Sınoptıkterdiń 24 shilde kúngi aýa raıy boljamy
ASTANA. QazAqparat - Atmosferalyq fronttardyń ótýine baılanysty 24 shilde kúni Qazaqstannyń basym bóliginde qubylmaly aýa raıy saqtalady. Keı jerlerde naızaǵaı oınap, jańbyr jaýady, jel kúsheıedi. Ońtústikte shańdy daýyl turady. Respýblıka boıynsha jekelegen jerlerde tuman, daýyl kútiledi, burshaq jaýýy múmkin, dep habarlaıdy QazAqparat «Qazgıdromet» RMK-ǵa silteme jasap.
Atap aıtqanda, Aqmola, Jambyl oblystarynyń keı jerlerinde daýyl kútiledi, jeldiń ekpini 15-20 m/s kúsheıedi, burshaq jaýýy múmkin. Aqmola oblysynda túnde jáne tańerteń tuman boljanady.
Soltústik Qazaqstan oblysynda keı jerlerde jeldiń ekpini 15-20 m/s artady, burshaq bolýy múmkin.
Qaraǵandy, Pavlodar oblystarynyń jekelegen aýmaqtarynda burshaq jaýýy yqtımal. Túnde jáne tańerteń tuman bolady, jeldiń jyldamdyǵy 15-20 m/s kúsheıedi.
Shyǵys Qazaqstan, Mańǵystaý, Qostanaı, Qyzylorda, Túrkistan, kúndiz Atyraý oblystarynyń keı jerlerinde jel 15-20 m/s artady. Qyzylorda, Túrkistan oblystarynda shańdy daýyl turady.
Sondaı-aq Aqtóbe oblysynyń basym bóliginde, Atyraý, Batys Qazaqstan oblystarynyń keı jerlerinde qatty ystyq bolady.
Budan bólek, Mańǵystaý, Qyzylorda, Túrkistan oblystarynda, Atyraý, Batys Qazaqstan, Aqtóbe, Qostanaı, Jambyl, Almaty oblystarynyń keı jerlerinde joǵary órt qaýpi saqtalady.
