Sınoptıkterdiń 15 qyrkúıek kúngi aýa raıy boljamy
ASTANA. QazAqparat - 15 qyrkúıek kúni antıtsıklonnyń áserinen Qazaqstannyń basym bóliginde jaýyn-shashynsyz aýa raıy saqtalady. Respýblıkanyń tek soltústiginde jáne shyǵysynda frontaldyq bólikterdiń ótýine baılanysty jańbyr jaýady. Keı jerlerde jel kúsheıip, ońtústikte jáne ońtústik-batysta shańdy daýylmen jel soǵady, dep habarlaıdy QazAqparat «Qazgıdromet» RMK-ǵa silteme jasap.
Atap aıtqanda, Qostanaı, Aqmola, Soltústik Qazaqstan, Pavlodar, Jambyl, Túrkistan oblystarynyń keı jerlerinde, kúndiz Qyzylorda, Mańǵystaý, Shyǵys Qazaqstan oblystarynda, sondaı-aq Almaty oblysynyń Jalańashkól aýdanynda jeldiń ekpini 15-22 m/s kúsheıedi. Qyzylorda men Mańǵystaý oblystarynda shańdy daýyl turady.
Shyǵys Qazaqstan oblysynyń keı jerlerinde túnde 3 gradýs úsik saqtalady.
Sonymen qatar Qyzylorda, Túrkistan, Mańǵystaý oblystarynda, Jambyl oblysynyń basym bóliginde, Atyraý, Batys Qazaqstan, Aqtóbe jáne Qaraǵandy oblystarynyń keı jerlerinde joǵary órt qaýpi saqtalady.
