Sınoptıkter jaz mezgiline boljam jasady
ASTANA. KAZINFORM – Konsýltatıvtik boljamǵa sáıkes, maýsym aıynda respýblıkanyń basym bóliginde aýanyń ortasha aılyq temperatýrasy normadan 1-2°S joǵary bolady dep kútiledi.
Shyǵys óńirlerde jáne eldiń qıyr soltústik-batysynda temperatýra klımattyq norma shamasynda bolady. Norma kórsetkishteri: Qazaqstannyń basym bóliginde +18…+23°S, eldiń ońtústik-batys jartysynda +24…+28°S, al ońtústik-shyǵys pen shyǵystaǵy taýly aýdandarda +7…+17°S bolady.
Kúndiz aýa temperatýrasy +30…+38°S-tan +15…+20°S-qa deıin qubylyp otyrady. Sonymen qatar, respýblıkanyń ońtústik jartysynda keı kúnderi aýa temperatýrasy +40…+45°S-qa deıin jetýi múmkin. Aptap ystyq kúnder salqyndaý kúndermen almasyp, nóser jańbyr, naızaǵaı, burshaq jáne daýyldy jel kútiledi.
Maýsymnyń alǵashqy onkúndiginde respýblıkanyń soltústigi men shyǵysynda, sondaı-aq ońtústik-shyǵystaǵy taýly aımaqtarda túngi jáne tańǵy ýaqytta úsik júrýi múmkin.
Shilde — jazdyń eń ystyq kezeńi. Bul aıda aýa temperatýrasy klımattyq norma shamasynda bolyp, ortasha ystyq bolady dep boljanyp otyr. Norma kórsetkishteri: Qazaqstannyń basym bóliginde +18…+24°S, ońtústik jartysynda +25…+30°S, ońtústik-shyǵys pen shyǵystyń taýly aýdandarynda +9…+17°S bolady.
Jazdyń sońǵy aıy — tamyzda da eldiń basym bóliginde ystyq aýa raıy kútiledi. Aýa temperatýrasy normadan 1-2°S joǵary bolady. Tek respýblıkanyń ońtústik-shyǵys bóliginde temperatýra norma shamasynda saqtalady. Norma kórsetkishteri: Qazaqstannyń basym bóliginde +20…+28°S, soltústik-shyǵys jartysynda +16…+19°S, shyǵys jáne ońtústik-shyǵystaǵy taýly aýdandarda +11…+15°S.
Jaýyn-shashynǵa kelsek, jalpy jaz mezgilinde respýblıkanyń kóp bóliginde jaýyn-shashyn mólsheri ortasha deńgeıde bolady dep kútiledi. Normadan az jaýyn-shashyn:
• maýsym aıynda eldiń ońtústik-batysynda, soltústik pen ortalyqtyń jekelegen aýdandarynda kútiledi. Norma: Qazaqstannyń basym bóliginde 25-49 mm, ońtústik-batys jartysynda 1,7-24 mm, soltústiktiń jekelegen jáne ońtústik-shyǵys pen shyǵystyń taýly aýdandarynda 51-155 mm bolady;
• shilde aıynda batys, ońtústik-batys, ońtústik jáne ońtústik-shyǵys óńirlerde kútiledi. Norma: Qazaqstannyń basym bóliginde 25-49 mm, ońtústik-batys jartysynda 1,4-24 mm, soltústik-batys, soltústik, ortalyq jáne shyǵystyń jekelegen aýdandarynda, sondaı-aq ońtústik-shyǵys pen shyǵystyń taýly aımaqtarynda 50-84 mm;
• tamyz aıynda ońtústik-batysta, ortalyqta, sondaı-aq ońtústik pen shyǵystyń keı aýdandarynda kútiledi. Norma: Qazaqstannyń basym bóliginde 1-24 mm, soltústikte, soltústik-batystyń, shyǵys pen ońtústik-shyǵystyń basym bóliginde 25-49 mm, al soltústik, shyǵys jáne ońtústik-shyǵystyń jekelegen aýdandarynda 50-63 mm.
Aıta ketelik búgin elimizdiń birqatar óńirinde aýa raıyna baılanysty eskertý jarııalanǵan edi.
