Sınoptıkter shilde aıyna arnalǵan aýa raıy boljamyn aıtty
ASTANA. QazAqparat - Aldyn ala boljam boıynsha, bıylǵy shilde aıynyń temperatýralyq rejımine kópjyldyq belgiler tán, tek Batys Qazaqstan, Atyraý, Mańǵystaý, Aqtóbe oblystarynda 1°S qalyptan joǵary temperatýra kútilýde.
Atyraý, Mańǵystaý, Qyzylorda, Ońtústik Qazaqstan oblystarynda, Batys Qazaqstan jáne Aqmola oblystarynyń basym bóliginde jaýyn-shashynnyń aılyq mólsheri qalyptan tómen, qalǵan aýmaqtaǵy jaýyn-shashyn mólsheri qalypty jáne qalyptan joǵary, dep habarlaıdy «Qazgıdromet» RMK.
Alǵashqy onkúndikte Qazaqstan aýmaǵyndaǵy jańbyrly aýa raıy Batys Sibir antıtsıklonynyń áserinen bolady jáne sońǵy onkúndikte kezekti Skandınavııa aýdandarynyń antıtsıklony ornaıdy.
3-4 jáne 7-8 shildede ótkinshi naızaǵaıly jańbyr, jel jyldamdyǵy 15-20 m/s bolady dep kútilýde. Aýa temperatýrasy túnde 10-18-den 18-26 gradýsqa deıin, kúndiz 22-30-dan 30-38 gradýs nólden joǵary bolmaq.
Qazaqstannyń soltústik-batys, soltústik jáne ortalyq bóliginde on kún boıy naızaǵaıly jańbyr jáne burshaq jaýýy múmkin. Jeldiń kúshi 9-14, naızaǵaı kezinde 15-20 m/s, aýa temperatýrasy túnde 8-17 jáne 17-22, kúndiz 15-25-ten 25-36 gradýsqa deıin kóteriledi.
Shyǵysta da jańbyr, naızaǵaı, burshaq bolýy múmkin, jel jyldamdyǵy 9-14, naızaǵaı bolsa 15-20 m/s, túnde 10-22, kúndiz 22-32 gradýs jyly bolmaq.
Ońtústikte 2-6 shilde kúnderi naızaǵaı men nóser jaýyn kútilýde. 2,7-8 shilde aralyǵy túnde 18-23, kúndiz 30-38 gradýs, qalǵan kúnderi túnde 13-18, kúndiz 25-30 jyly bolady.
Ońtústik-shyǵysta búkil kezeń jańbyr men naızaǵaı, 4-5 shilde kúnderi burshaqty jańbyr jaýýy múmkin. Túnde 18-23-ten 12-17-ge deıin, kúndiz 27-35 jáne 22-27 gradýs ózgermeli aýa temperatýrasy bolady.
Boljam boıynsha, ekinshi onkúndikte Ortalyq Azııadan jyly aýa massalarynyń kelýimen jaýyn-shashynsyz aýa raıy bolady. Batys, ońtústik jáne ońtústik-shyǵysta aýa temperatýrasy 38 gradýsqa deıin, soltústik, shyǵys jáne ortalyqta 35 gradýsqa deıin kóteriledi.
Shildeniń úshinshi onkúndiginde belsendi tsıklon áserinen jańbyrly salqyn aýa raıy kútilýde.
Eskertý: Sınoptıkalyq jaǵdaıdyń ózgerýine qaraı konsýltatıvtik boljam túzetilip otyrady.
