Sınoptıkter naýryz aıynda aýa raıy qandaı bolatynyn aıtyp berdi
ASTANA. QazAqparat - «Qazgıdromet» RMK-nyń sınoptıkteri naýryz aıyna arnalǵan aýa raıy boljamyn usynady, dep habarlaıdy «QazAqparat» HAA tilshisi.
Birinshi onkúndiktiń basynda jáne sońynda Reseıdiń Eýropalyq aýmaǵynan keletin sýyq antıtsıklonnyń áserinen Qazaqstannyń basym bóliginde kún birshama sýytatyn bolady.
Respýblıkanyń keıbir óńirlerinen frontaldyq bólimderdiń ótýine baılanysty (jańbyr, qar), ońtústikte jáne ońtústik-shyǵysta qatty jaýyn-shashyn bolýy múmkin. Aýa temperatýrasy soltústikte túnde aıaz -20 -28-ge tómendese, kúndizgi temperatýra -10, -18 shamasynda. Elimizdiń ońtústik óńirlerinde túnde aýa temperatýrasy 0...8-ge deıin baryp, kúndiz termometr baǵany 0...5 gradýsty kórsetedi.
Birinshi onkúndiktiń ortasynda ońtústik tsıklonnyń áserine baılanysty elimizdiń basym bóliginde keı jerlerde ekpindi jaýyn-shashyn (qar) jáne temperatýranyń joǵarylaýy kútiledi.
Osylaısha aı boıy kóktemgi jylý men sýyq kúnder almasyp otyrady. Dál osyndaı aýa raıy ekinshi onkúndiktiń ortasy men úshinshi onkúndikte de kútiledi.
Naýryzdaǵy aýa temperatýrasy ortasha normadan joǵary 1...20S deıin bolady degen boljam bar. Tek Shyǵys Qazaqstan, Aqmola, Pavlodar, Batys Qazaqstanda, Qostanaıdyń basym bóliginde jáne Aqtóbeniń soltústiginde normaǵa jýyq bolady.
Jaýyn-shashynnyń aılyq mólsheri Atyraý, Mańǵystaý, Qyzylorda, Qaraǵandy men Aqtóbeniń ońtústiginde normaǵa jýyq, Almaty, Jambyl, Ońtústik Qazaqstan, Batys Qazaqstan, Qostanaı, Soltústik Qazaqstan, Aqmola, Pavlodar jáne Shyǵys Qazaqstan oblystarynda normadan asady dep kútilýde.
Sınoptıkter aılyq boljamnyń 60-65% yqtımaldylyqpen berilgenin aıtady.
