Sınoptıkter «Mılton» daýyly týraly: jaǵalaýda tolqyn 3-4 metrge jetýi múmkin

ASTANA. KAZINFORM - Sársenbi kúni keshke «Mılton» daýylynyń jaqyndaýyna baılanysty AQSh-tyń Florıda shtatynan bes mıllıonǵa jýyq adam evakýatsııalandy. Shtattyń úshinshi úlken qalasy Tampa qalasynyń meri sońǵy 100 jyldaǵy eń qýatty daýyl aımaǵynda qalý - ólimmen teń ekenin eskertti, dep jazady VVS.

- Eger evakýatsııalaý aımaǵynda qalýdy tańdasańyz, sizdi ólim kútip tur dep aıta alamyn, - dedi Djeın Kastor CNN-ge.

Sınoptıkter tolassyz jaýǵan jańbyr men ekpindi jel jaǵalaýdy ǵana emes, ishki aýmaqtardy da qatty sý basý qaýpin týǵyzatynyn eskertedi.

Jaǵalaýda tolqyn 3-4 metrge jetýi múmkin.

Florıdanyń túzeý departamentiniń málimeti boıynsha, 4,5 myńnan astam adam apat aımaǵynan kóshirildi.

Tampa mańyndaǵy áskerı áýe bazasy da evakýatsııalandy.

Agenttik «Mılton» daýyly saldaryn joıý úshin qajetti resýrstardy barynsha daıyndaǵanyn habarlaıdy: bul qalalyq jáne teńizdegi izdeý-qutqarý toptary, medıtsınalyq bólimsheler, AQSh armııasy korpýsynyń ýaqytsha kúsh toptary, ınjenerler men qaldyqtardy joıý mamandary. Meteorologtar «Mılton» daýylynyń birneshe tornado týdyrýy múmkin ekenin eskertedi.

Ulttyq muhıttyq jáne atmosferalyq qaýymdastyq daýyldy Saffır-Sımpson shkalasy boıynsha eń joǵary bes sanatqa baǵalanǵanyn aıtty.