Sınoptıkter maýsym aıynyń salqyn, ári jaýyndy bolatyndyǵyn boljaýda
ASTANA. QazAqparat - «Qazgıdromet» RMM 2017 jylǵy maýsym aıyna arnalǵan konsýltatıvtik boljamdy jarııalady, dep habarlaıdy QazAqparat.
«Aıdyń basynda batys aımaqtar aýa-raıyna belsendi tsıklondar yqpal etip, aýa-raıynyń nasharlaý jaǵdaıyna sebep bolady. Nóserli jańbyr, naızaǵaı, burshaq, soltústik-batys jeldiń jyldamdyǵy 15-20 m/s jetip, túnde aýa temperatýrasynyń +5-13 gradýsqa deıin tómendese, kúndiz +15-23 gradýsqa jetedi. Elimizdiń qalǵan aýmaǵyna ońtústik-batys aǵyndarymen jyly aýa massalary keledi, osyǵan baılanysty elimizdiń soltústiginde aýa temperatýrasy kúndiz +25-33 gradýsqa deıin jyly, al ońtústikte +30-39 gradýs deıin joǵarylaıdy. Alaıda, jylyný qysqa merzimdi bolady, aldaǵy demalys kúnderi batys aımaqtardaǵy aýa-raıy nasharlap, shyǵys baǵytyna aýysyp, Qazaqstannyń basqa da oblystaryn qamtıtyn bolady», - delingen boljamda.
Sınoptıkter kelesi aptanyń ortasyna qaraı elimizdiń soltústigi men ortalyǵynyń keı jerlerinde jańbyr, naızaǵaı bolyp, jekelegen aýdandarda burshaq bolýy múmkin dep otyr.
Málimetterge sáıkes, aıdyń ekinshi jáne úshinshi onkúndikterinde salqyndaýdyń kezekti eki tolqyny kútilýde.
