Sınoptıkter Qazaqstannyń úsh aımaǵynda ózender arnasynan asýy múmkin ekenin eskertti
ASTANA. KAZINFORM – Qazgıdromet málimetinshe, aldaǵy kúnderi nóser jańbyr jaýyp, qardyń qatty erýi Qazaqstannyń birneshe aımaǵynda sý deńgeıiniń kóterilýine jáne sý tasqynyna ákelýi múmkin.
5-7 sáýir aralyǵynda jaýyn-shashynnyń mol bolýyna baılanysty Jambyl oblysynyń taýly jáne taý bókterindegi aýdandarynda betkeılerden aǵyn sýlar men ózen deńgeıi kóterilýi múmkin. Qaýipti deńgeıden asyp ketse, ózenderdiń jaıylma aımaqtarynda ornalasqan eldi mekenderdi, qosalqy ǵımarattardy jáne jergilikti joldardy sý basý qaýpi bar.
Shyǵys Qazaqstan oblysynda turaqty oń temperatýraǵa (túnde 5°C deıin, kúndiz 15-23°C deıin) jáne 5-6 sáýirde batys, soltústik jáne shyǵysta boljanatyn jaýyn-shashynǵa (negizinen jańbyr) baılanysty 4-6 sáýir aralyǵynda qar qarqyndy erip, ózen muzy jarylýy múmkin. Ózen arnalarynda muz keptelisteri, erigen sýlar men betkeılerde aǵyn sýlar paıda bolady. Sondaı-aq ózen deńgeıi kóterilýi múmkin. Bul eldi mekenderdi, turǵyn úılerdi jáne qosalqy ǵımarattardy sý basýǵa, sondaı-aq joldardyń ústi arqyly sý tasqynyna ákelýi múmkin.
Qostanaı oblysynda 4-7 sáýir aralyǵynda keıbir aýdandarda (oblystyń ońtústik-batysynda, batysynda jáne soltústik-batysynda) nóser jańbyr jaýady. Osy boljamǵa baılanysty sý deńgeıiniń kóterilýi, jer ústi aǵynynyń qarqyndy bolýy jáne aýlalar men kommertsııalyq nysandardy sý basý, jergilikti joldardan asyp ketý jáne oıpat jerlerde sýdyń jınalýy sııaqty qaýipti gıdrologııalyq qubylystar boljanyp otyr.
Aıta keteıik, Batys Qazaqstan oblysynda Qaraózendegi sý deńgeıi 7 metrge jýyqtady.
SQO-da Esil ózeniniń sýy bir táýlikte 160 sm kóterildi.
Úlbi ózeninde muz jarylyp, sý tasqyny qaýpi tómendetildi.
