Sınoptıkter qańtardyń 10-y kúngi aýa raıy boljamyn jarııa etti
ASTANA. QazAqparat - Qańtardyń 10-y kúni Qazaqstannyń basym aýmaǵynda atmosferalyq aǵyndardyń ótýine baılanysty aýa raıy qubylmaly bolady, dep habarlaıdy QazAqparat «Qazgıdromet» RMK-nyń málimetterine súıene otyryp.
Respýblıkanyń birqatar aýmaqtarynda jaýyn-shashyn bolyp, keı jerlerde kóktaıǵaq, tuman, burqasyn bolýy yqtımal, sondaı-aq jel kúsheıedi.
Almaty oblysynyń keı jerlerinde tuman, kóktaıǵaq bolyp, kúndiz keı jerlerde jeldiń jyldamdyǵy sekýndyna 15-20 metrge jetedi. Jalańashkól aýdanynda jel 20-25 m/s jyldamdyqpen uıtqıdy.
Qyzylorda oblysynyń birqatar aımaqtarynda tuman túsip, kóktaıǵaq bolady, tańerteń jáne kúndiz jel 15-20 m/s jyldamdyqpen soǵady.
Túrkistan oblysynyń keı jerlerinde tuman túsip, kóktaıǵaq bolyp, tańerteń jáne kúndiz jeldiń jyldamdyǵy sekýndyna 15-20 metrge jetedi, ekpini 25 m/s bolady.
Jambyl, Mańǵystaý oblystarynyń keı jerlerinde tuman túsip, kóktaıǵaq bolýy yqtımal.
Qaraǵandy, Shyǵys Qazaqstan oblystarynyń birqatar aımaqtarynda burqasyn bolady, jel 15-20 m/s-qa deıin kúsheıedi.
Aqmola, Atyraý, Batys Qazaqstan, Qostanaı, Soltústik Qazaqstan oblystarynyń keı jerlerinde tuman túsýi múmkin.
