Sınoptıkter eskertýin elemegen jambyldyq kóligimen qar qursaýynda qaldy
TARAZ. QazAqparat – Aýa raıynyń nasharlaýyna qaramastan kóligimen Tarazdan Shymkentke attanǵan júrgizýshi qar qursaýynda qaldy, dep habarlaıdy QazAqparat tilshisi.
Jambyl oblysynyń Polıtsııa departamenti Jergilikti polıtsııa qyzmeti basqarmasynyń qyzmetkerleri «Batys Eýropa - Batys Qytaı» tasjolynyń 582-shaqyrymynda qar qursaýynda qalyp qoıǵan kólik júrgizýshisine kómek kórsetti. Jýaly aýdany Shaqpaq aýylynyń ýchaskesin patrýldeý kezinde polıtsııa qyzmetkerleri 37 jastaǵy júrgizýshiniń basqarýymen qarda turyp qalǵan «BMV 520» markaly avtokóligin kórgen.
Polıtsııa qyzmetkerleri ózge azamattardyń kúshimen kólikti qar qursaýynan bosatty. Júrgizýshiniń aıtýynsha, aýa raıynyń qolaısyzdyǵyna qaramastan, ol Tarazdan Shymkent qalasyna qaraı bet alǵan. Alaıda, júrip kele jatqan kóligi joldan shyǵyp ketip, jol jıegindegi omby qarǵa túsken. Óz betinshe qardan shyqpaq bolǵan áreketinen eshteńe shyqpaı abyrjyǵan júrgizýshi jylyný úshin kólikke kirip otyrǵan. Osy kezde oǵan kútpegen jerden kómek kelgen.
Jambyldyq polıtsııa qyzmetkerleri júrgizýshini baqylaýǵa alyp, Túrkistan oblysy shekarasynyń aýmaǵyna deıin shyǵaryp salǵan. Er adam polıtseılerge shyn júrekten alǵysyn aıtyp, olardyń juystaryna sáttilik tiledi.
«Aýa raıynyń qolaısyzdyǵyn, joldarda kóktaıǵaqtyń paıda bolýyn, jel men borannyń kúsheıýin, sondaı-aq keı jerlerde tumannyń túsýine baılanysty jol-kólik oqıǵalarynyń ósý qaýpi artýda. Júrgizýshiler aýa raıy týraly eskertýlerge nazar aýdaryp, joldaǵy jaǵdaıdy qadaǵalap, múmkindiginshe jolǵa shyqpaǵandary durys», - delingen Polıtsııa departamentiniń habarlamasynda.
