Sınoptıkter Astanada aıazdyń beti qashan qaıtatynyn aıtty
ASTANA. QazAqparat - Sınoptıkter aldaǵy úsh kúnde Astanada aýa raıy qandaı bolatyny týraly boljamymen bólisti, dep habarlaıdy QazAqparat tilshisi.
«Astanada 7 aqpan kúni kóshpeli bult júredi, qar jaýmaıdy. Aýa temperatýrasy túnde -35-37, kúndiz -25-27 gradýs deńgeıinde saqtalady. 8 aqpan kúni de kóshpeli bult júrip, qar jaýmaıdy. Aýa temperatýrasy túnde -30-32, kúndiz -19-21 gradýs shamasynda bolady. 9 aqpanda kóshpeli bult júrip, ýaq-ýaq qar jaýady. Azdap burqasyn bolady. Aýa temperatýrasy túnde -20-22, kúndiz -10-12 gradýs shamasynda saqtalady», - deıdi ınjener-sınoptık Aınur Qaıyńbaeva.
Ol sonymen qatar, 9 aqpannan keıin azdap kún jylynǵanymen, qatty aıaz qaıtyp kelýi yqtımal ekendigin aıtty.
«Aqpan aıynda kúnniń sýyqtyǵy saqtalady. Respýblıkanyń soltústik óńirlerinde temperatýra normadan 1 gradýs tómen bolsa, ońtústik óńirlerde normaǵa jaqyn bolady», - deıdi ol.
Eske sala ketsek, buǵan deıin ınjener-sınoptık Aınur Qaıyńbaeva aldaǵy eki táýlikte sýyqtyń beti qaıtpaıtynyn jetkizgen edi.
«Aldaǵy eki táýlikte eldiń basym aýmaǵynda sýyq aýa raıy saqtalady. Alaıda atmosferalyq aǵyndar ótkennen keıin aýa raıy shyǵys baǵytpen aralasyp, munyń aqyrynda qar jaýyp, sońy qatty jel men boranǵa ulasady. Sodan keıin aýa temperatýrasy kóteriledi», - degen edi sınoptık.
