Sınoptıkter Almatyda kúnniń nege qatty kúrkiregenin túsindirip berdi
ALMATY. QazAqparat - Búgin Almatyda tańerteńgilik ýaqytta kún qatty kúrkiregen bolatyn. Sınoptıkter osyǵan baılanysty túsinikteme berdi.
«Qazgıdromet» RMK Almaty fılıalynyń meteoboljam bóliminiń bastyǵy Svetlana Amanqulovanyń aıtýynsha, kúnniń kúrkiregeni tańerteńgi saǵat 07:25 pen 08:30 aralyǵynda bolǵan.
«Qazir Almaty oblysy aýmaǵynda tsıklon júrýde. Búgin kúnniń bultty bolýy, onyń batystan shyǵysqa qaraı baǵyttalǵany soǵan baılanysty bolyp otyr. Osy bulttardyń boıynda jekelegen iri bulttar qalyptasty. Onyń tómengi shegi jerge deıin 4,5 shaqyrymdy quraıdy. ıAǵnı, taýdan da tómen. Osy bultta jyly jáne salqyn aýa massalarynyń oryn aýystyrýyna baılanysty qarqyndy úderister, temperatýralyq qarama-qaıshylyqtar oryn alyp, alyp naızaǵaılar oınap jatyr. Bul úderister kóktem jáne jaz aılarynyń basynda bolatyn qalypty qubylys», - dedi S. Amanqulova.
Almatyda jaqyn aptalarda aýa raıy turaqsyz bolady, naızaǵaı oınap, jańbyr jaýady jáne jel turady. 4-6 shildede qalanyń keıbir aýdandarynda burshaq jaýady dep kútilýde.
