Sınoptıkter Almatynyń jeltoqsan aıyndaǵy kún raıy boljamyn jarııalady

ALMATY. KAZINFORM – Almatyda jeltoqsan aıynyń basynda kún kúrt qubylady.

Birneshe kúnnen beri tynshyp turǵannan keıin ile-shala jańbyr jaýyp, arty qarǵa ulasyp, uıytqyp jel soǵady. 

Sınoptıkterdiń málimetinshe, jaýyn-shashyn qalany tumshalap turǵan tútindi qýyp, aýa tazaryp qalady.

Qazgıdromet málimetinshe, 2 jeltoqsanda sirkirep jaýyn jaýyp, kún azdap bulttanady. Túnde –4 °C deıin sýytyp, kúndiz +7…+9 °C shamasynda jyly bolady. Jel álsin-álsin soqqan kúnderi qalany qaıta tútin basýy yqtımal. Biraq jeltoqsannyń 3-i kúni soltústik-shyǵystan uıytqyp jel soǵady. 

4 jeltoqsanda kúndiz aýa temperatýrasy +11 °C-qa deıin kóteriledi, jańbyr jaýyp, jel kúsheıip, las aýa seıile bastaıdy. 5 jáne 6 jeltoqsanda túnde jańbyr men qar aralas jaýyn, kúndiz jańbyr jaýady. Osy kúnderi aýa erekshe taza bolady: shań basylyp, ylǵaldanyp, dem alý jeńildeıdi. Túnde shamamen 0 °C, kúndiz +7…+9 °C bolady.

7 jáne 8 jeltoqsanda kún jaýyn-shashynsyz, biraq kúndiz +12 °C-qa deıin jylıdy. Shyǵystan soqqan jel qalany tumshalap turǵan tútindi seıiltkenimen, jańbyr jaýǵan kezdegideı asa taza bola qoımaıdy. 

9 jeltoqsanda qaıtadan jańbyr jaýyp, kúndiz +14 °C-qa deıin jylıdy. 

10 jeltoqsanda túnde jańbyr men qar aralas jaýyn, kúndiz jańbyr jaýady. Soltústik-batystan kúshti jel soǵyp, qar aralas jańbyr jaýady. 

Jalpy alǵanda, jeltoqsannyń alǵashqy onkúndigi almatylyqtarǵa qolaıly bolady: jaýyn jıi jaýyp, jel soǵyp, qalany tumshalaǵan tútindi tarqatyp otyrady. 

-Aldaǵy kúnderi taza aýada serýendep, qydyryp qaıtýǵa múmkindik kóp,-delingen habarlamada.

Osyǵan deıin jeltoqsan aıynda bolatyn kún raıy boljamyn jarııaladyq.