Sınoptıkter aldaǵy 3 kúnniń aýa raıy boljamyn aıtty
ASTANA. QazAqparat - «Qazgıdromet» RMK 19-21 qazanǵa aýa raıy boljamyn jarııalady, dep habarlaıdy QazAqparat.
«Ǵaryshtan túsirilgen sýrette Qazaqstannyń ústinde bultty sýyq aýa aǵyndary baıqalyp tur. Aldaǵy táýlikte respýblıkanyń kóptegen oblystarynda jańbyr jaýyp, ońtústik jáne ońtústik-shyǵystyń keıbir jerlerinde kúshti nóser bolýy yqtımal», - dep habarlady sınoptıkter.
Salqyn aǵyndardyń artynan Kavkaz aýmaǵynan antıtsıklon taralady. Soǵan baılanysty respýblıka aýmaǵynda jaýyn-shashyn toqtap, temperatýra tómendeıdi.
Batys Sibirge Reseıdiń eýropalyq bóliginiń soltústik aýdandarynan kezekti tsıklon jetedi. Ol Qazaqstan aýmaǵynan alys bolsa da, oǵan kiretin arktıkalyq atmosferalyq aýa aǵyndary júıesi 20-21 qazanda respýblıkanyń batys jáne soltústik oblystaryna aýysyp, jaýyn-shashyn alyp keledi.
