Sınoptıkter: Aldaǵy kúnderi aýa raıy kúrt sýytady

ASTANA. KAZINFORM — «Qazgıdromet» RMK osy aptada aýa raıynyń kúrt nasharlaıtynyn eskertedi, dep habarlaıdy Kazinform tilshisi.

Sınoptıkterdiń aıtýynsha, el aýmaǵynan soltústik-batys tsıklony ótetindikten, qar jaýyp, boran soǵady, kóktaıǵaq pen tuman kútiledi.

Alaıda 9 jeltoqsanda antıtsıklonnyń kelýimen jaýyn-shashyn toqtap, aýa temperatýrasy kúrt tómendeı bastaıdy.

Elimizdiń birneshe oblysynda aıaz kóteriledi:

• 9 jeltoqsanda Aqtóbe oblysynda aýa temperatýrasy –13…–18°-tan –20…–25° aıazǵa deıin túsedi;

• Qostanaı jáne Aqmola oblystarynda 9–10 jeltoqsanda –22…–27°, keı jerlerde –30° aıaz kútiledi;

• Soltústik Qazaqstan oblysynda osy kúnderi –25…–30° aıaz boljanady;

• Pavlodar oblysynda 9–11 jeltoqsanda –20…–25°-tan –25…–30°-qa deıin tómendeıdi;

• Qaraǵandy oblysynda 9–10 jeltoqsanda aıaz –15…–20°-tan –22…–32°-qa deıin kúsheıýi múmkin;

• Eldiń shyǵysynda 10–11 jeltoqsanda –25…–30° aıaz bolady.

Buǵan deıin sınoptıkter Astanaǵa ne sebepti qar jaýmaı turǵanyn túsindirdi.

Al aýyl sharýashylyǵy mınıstriniń orynbasary Azat Sultanov qarsyz qystyń dıqandarǵa qalaı áser etetini týraly pikir bildirdi.