Sınoptıkter 31 qańtarda Qazaqstanda aıazdy kún raıy bolatynyn boljaýda
ASTANA. 30 qańtar. QazAqparat - Kólemdi antıtsıklon Qazaqstan aýmaǵynyń basym bóligine yqpalyn tıgizedi, sondyqtan 31 qańtar kúni aıazdy kún raıy saqtalady, dep habarlaıdy Qazgıdrometke silteme jasaǵan TJM-niń baspasóz qyzmetinen.
Respýblıkanyń ońtústik bóligi ońtústik tsıklonǵa baılanysty atmosferalyq fronttardyń yqpalynda bolyp, onymen birge jaýyn-shashyn (jańbyr, qar), ekpindi jel, tuman, kóktaıǵaq kútiledi.
Ońtústik Qazaqstan oblysynda jel jyldamdyǵy 15-20 m/s quraıdy, tańerteń jáne kúndiz keıbir jerlerde jel 23-28 m/s deıin kóteriledi, keıbir jerlerde tuman, kóktaıǵaq bolady.
Jambyl oblysynyń birqatar aımaqtarynda tuman túsip, kóktaıǵaq, jel jyldamdyǵynyń 15-20 m/s deıin kóterilýi, jel ekpininiń 23-28 m/s deıin ósýi kútilýde.
Almaty oblysynda túnde keıbir jerlerde tuman túsedi, kúndiz Alakól mańynda jeldiń kúshi 15-20 m/s deıin jetedi.
Qyzylorda, Mańǵystaý oblystarynda keıbir jerlerde tuman túsip, kóktaıǵaq, jel jyldamdyǵynyń 15-20 m/s deıin ósýi yqtımal.
Aqtóbe oblysynyń keıbir jerlerinde burqasyn, jeldiń 15-20 m/s jyldamdyqpen soǵýy kútiledi, Qostanaı oblysynyń keıbir jerlerinde tuman kútiledi, tańerteń jáne kúndiz keıbir jerlerde 15-20 m/s jyldamdyqpen jel soǵady, Qaraǵandy oblysynyń keıbir jerlerinde jeldiń kúshi 15-20 m/s quraıdy.
Aldaǵy táýlikte respýblıkanyń ońtústik, ońtústik-shyǵys jáne shyǵysynyń jekelegen alasa taýly ózenderinde sý deńgeıiniń aýytqýy baıqalady. Qazaqstannyń qalǵan sý nysandarynda gıdrologııalyq rejımde aıtarlyqtaı ózgerister kútilmeýde.
