Sınoptıkter: 16-17 naýryzda ShQO-da sý kólemi artady
ASTANA. QazAqparat - Tótenshe jaǵdaılar komıteti jáne Tótenshe jaǵdaılar departamentiniń jedel shtabtary Shyǵys qazaqstan oblysyndaǵy jańbyrdan keıingi qarǵyn sýdy azaıtý jumystaryn jalǵastyryp jatyr, dep habarlaıdy óńirdegi TJK baspasóz qyzmeti.
«Eki qala men 10 aýdan sý tasqyny zardabyn tartyp otyr. Komıısııa shyǵyndardy esepteý ústinde. 50 myń tekshe metr sý sorǵytyldy. Qaýipti jerlerge 8000 qumqap tóseldi. Turǵyndar qaýipsiz jerlerge kóshirilip, ystyq tamaqpen qamtamasyz etildi. Qaýipti jerler áýe baqylaýyna alyndy»,-dep jazylǵan habarlamada.
Aıagóz, Kúrshim, Tarbaǵataı, Ulan, Úrjar, Zaısan, Glýbokoe, Katonqaraǵaı, Zyrıan, Shemonaıha aýdandary men Rıdder, Óskemen qalalaryna beketter qoıylyp, táýlik boıy kezekshilik uıymdastyrylǵan. Jaǵdaı ázirge qalypty.
16-17 naýryzda sınoptıkter kún jylynyp, ózenderdegi sý kóleminiń artatynyn eskertedi.
