Sınopte 1600 jyldyq tarıhy bar mozaıkalyq edender týrısterge kórsetiledi

ASTANA. KAZINFORM — Túrkııanyń Sınop qalasynda Balatlar kesheniniń qazbalarynan tabylǵan 1600 jyldyq mozaıkalyq edenderdi kórsetý úshin arnaıy ekspozıtsııa jasalyp jatyr dep habarlaıdy Anadolý agenttigi.

Bul jumys Mádenıet jáne týrızm mınıstrligi men Mımar Sınan atyndaǵy Óner ýnıversıtetiniń qoldaýymen júrgizilip, mozaıkalar qalpyna keltirilgen.

Jaqynda ashylýy josparlanǵan jobanyń aıasynda qazba ornyna týrısterge arnalǵan ortalyq qurylmaq, onda tek mozaıkalar ǵana emes, sonymen qatar tarıhı eskertkishter de kórsetiledi. Ortalyqta aǵash joldar, qaýipsiz qozǵalý platformalary, aqparattyq pannolar jáne navıgatsııalyq júıeler de ornatylady.

Sınop gýbernatory Mýstafa Ozarslan qazbalardyń qalanyń mádenı týrızminde mańyzdy oryn alatynyn aıtty. 2010 jyldan beri professor Gıýlgıýn Keroglý jetekshiligimen júrgizilgen qazbalarda ellınıstik, rımdik, vızantııalyq, seldjýk jáne osman dáýirine jatatyn kóptegen artefaktiler tabylǵan.

Ozarslannyń aıtýynsha, tarıhı aımaqty týrısterge ǵylymı turǵydan zerttelip, rettelgen, baqylaýǵa alynǵan kúıinde usyný úshin Soltústik Anatolııany damytý agenttigimen birlese jumys júrgizilip jatyr.

«Ortalyqtyń jobadaǵy negizgi maqsattary — eskertkishterdi saqtaý jáne týrısterdi basqarý. Arhıtektýralyq sheshimder tarıhı qurylymǵa sáıkes bolady, tabıǵı materıaldar qoldanylady, múgedekter úshin qoljetimdilik qarastyrylady. Balatlar kesheni Sınop týrıstik baǵytynda jańa kórikti orynǵa aınalady jáne qalanyń týrıstik belsendiligin arttyrady. Bul ǵylymı jáne mádenı týrızmdi damytyp, Sınopty ulttyq jáne halyqaralyq deńgeıde tanymal etedi», dedi gýbernator.

Eske sala ketsek, buǵan deıin Túrkııada Túrki dúnıesi arheologteri qaýymdastyǵynyń ekinshi otyrysy ótkenin jazdyq.