Synyptastary jezókshelikke májbúrlegen 16 jastaǵy oqýshynyń anasyna aıyppul salyndy

QYZYLORDA. KAZINFORM — Qyzylordada synyptastarynyń 16 jastaǵy qyzdy seksýaldy quldyqta ustaýyna baılanysty oqıǵadaǵy jábirlenýshiniń anasy ákimshilik jazaǵa tartyldy. 

Іsti kámeletke tolmaǵandardyń isteri jónindegi Qyzylorda oblystyq mamandandyrylǵan aýdanaralyq soty qarady.

— Ákimshilik quqyqbuzýshylyq týraly kodekstiń 127-babynyń 1-bóliginde kózdelgen ákimshilik quqyq buzýshylyq jasaǵany úshin, ıaǵnı kámeletke tolmaǵan adamdy tárbıeleý jáne (nemese) oǵan bilim berý, onyń quqyqtaryn jáne (nemese) múddelerin qorǵaý jónindegi mindetterdi, qaýipsizdigin qamtamasyz etý jónindegi sharalardy oryndamaǵany úshin kámeletke tolmaǵan jábirlenýshiniń ata-anasyna qatysty ákimshilik is qaralyp, oǵan aıyppul salý jazasy taǵaıyndaldy, — delingen habarlamada.

Sottyń málimetinshe, jábirlenýshiniń anasy taǵaıyndalǵan aıyppul somasyn 30%-ǵa qysqartylǵan túrde, ıaǵnı 7 AEK (27 524 teńge) kóleminde tóleýi tıis. Qaýly áli zańdy kúshine engen joq.

Eske salaıyq, 2024 jyly Qyzylordada synyptasyn jezókshelikpen aınalysýǵa májbúrlegen oqýshylar kúdikke ilingen bolatyn. 

Artynsha keleńsizdikke jol bergender qyzmetinen ketti. 

Keıin QR ІІM jábirlenýshi turatyn aýmaqty táýlik boıy kúzetti. 

Tergeý júrip jatqanda Qyzylordada oqýshyny jezókshelikke májbúrlegen 8 kúdikti qamaldy. 

Keıinirek oqýshyny jezókshelikke májbúrleýge qatysty 13 adam anyqtaldy. 

3 sáýir kúni Qyzylordada 16 jastaǵy qyzdy synyptastary seksýaldy quldyqta ustaǵan oqıǵaǵa qatysty 9 adamǵa sot úkimi shyqty. 

Al bıyl maýsym aıynda Qyzylorda oblystyq soty kámelet jasyna tolmaǵan jábirlenýshini azaptaý, jezókshelikpen aınalysýǵa tartý faktileri boıynsha appelıatsııalyq satydaǵy isti qarady.