Synypta oqýshylar karta oınaǵan: Túrkistan oblysynda mektep basshylyǵy men muǵalim qyzmetinen bosatyldy
TÚRKІSTAN. KAZINFORM – Túrkistan oblysy Saryaǵash aýdanyndaǵy mektepterdiń birinde oqýshylardyń synyp bólmesinde karta oınap otyrǵan sáti beınelengen vıdeo áleýmettik jelilerde tarady.
Túrkistan oblysy Bilim basqarmasynyń habarlaýynsha, atalǵan jaǵdaı Saryaǵash aýdany №38 M. Maqataev atyndaǵy jalpy bilim beretin mektepte bolǵan.
Vedomstvo málimetinshe, keleńsiz jaǵdaıdy eń aldymen Bilim basqarmasynyń ózi anyqtaǵan. Oqıǵa týraly aqparat túsken boıda basqarma tarapynan arnaıy top qurylyp, mekteptegi jaǵdaı jedel ári tolyq tekserilgen.
Zerdeleý nátıjesinde bilim berý protsesine qoıylatyn talaptardyń saqtalmaýyna jáne bilim berý standarttaryna sáıkes kelmeıtin birqatar kemshilikterge jol berilgeni anyqtalǵan.
– Kináli laýazymdy tulǵalarǵa qatysty tártiptik jáne zańda kózdelgen ózge de sharalar qabyldanady. Qazirgi tańda atalǵan mekteptiń dırektory men alǵashqy áskerı jáne tehnologııalyq daıyndyq pániniń muǵalimi óz ótinishi negizinde jumystan ketti. Sonymen qatar dırektordyń tárbıe isi jónindegi orynbasary laýazymdyq mindetinen bosatyldy, – delingen basqarma usynǵan aqparatta.
Ákimshilik quramnyń basqa da músheleri, atap aıtqanda dırektordyń ekinshi tárbıe jónindegi, beıindik jáne oqý isi jónindegi orynbasarlary eńbekke jaramsyzdyq kezeńi aıaqtalǵannan keıin jumysqa shyqqan kúni laýazymdyq mindetten bosatylatyny belgili boldy.
Budan buryn Shymkentte oqýshy qyzǵa azǵyndyq áreket jasady degen kúdikpen mektep muǵalimi qamaýǵa alynǵanyn jazǵan edik.
