Synypta qansha oqýshy aýyrsa, sabaq onlaınǵa aýysady

ÓSKEMEN. KAZINFORM — Shyǵys Qazaqstan oblystyq bilim basqarmasynan bir synyp oqýshylarynyń qansha paıyzy aýyryp qalsa, sabaq onlaınǵa kóshiriletindigin túsindirip berdi.

Kúz kelip, kún sýytqanda oqýshylar arasynda sýyq tıip, aýyryp qalatyndar kóbeıetindigi belgili. Búginde oblys mektepterinde keı synyptarda aýyrǵan oqýshylardyń kóptigine baılanysty sabaq onlaın formatqa kóshirilgen. Osy rette, bilim basqarmasynan qandaı jaǵdaıda sabaq qashyqtan oqytýǵa aýystyrylatyndyǵyn túsindirip berdi.

— Negizinde JRVI jáne tumaý órshýi kezeńinde bilim berý uıymdarynda ýaqytsha shekteý sharalary engiziledi. Bul týraly QR Bas memlekettik sanıtarııalyq dárigeriniń 2025 jylǵy 22 tamyzdaǵy № 6-PGSV «Tumaý, jiti respıratorlyq vırýstyq ınfektsııalar jáne COVID-19 koronavırýs ınfektsııasy boıynsha 2025-2026 jyldardyń epıdemııalyq maýsymynda sanıtarııalyq-epıdemııaǵa qarsy, sanıtarlyq-profılaktıkalyq is-sharalar júrgizý týraly» qaýlysynda jazylǵan. Eger bir synypta bir ınkýbatsııalyq kezeń ishinde oqýshylardyń 20-30%-y JRVI-men aýyrsa, kabınettik oqytý toqtatylyp, 10 kún boıy bul synypqa jańa oqýshylar qabyldanbaıdy, — dep habarlady basqarmanyń baspasóz qyzmetinen.

Al aýyrǵandar sany 30%-dan asyp ketse, synyp oqýshylary tolyqtaı ýaqytsha onlaın oqytý formatyna aýystyrylady.

Ázirge bilim basqarmasy óńir boıynsha naqty qansha mektep synyby onlaın oqytýǵa kóshirilgeni týraly aqparat bermedi. 

Eske salsaq, osyǵan deıin elorda mektepterinde betperde taǵý rejımi engizilmegeni habarlanǵan.