Synyq pen aýyr jaraqat: Qazaqstanda dárigerlerge qajet quraldar kóbeımek
ASTANA. KAZINFORM — Mınıstr aýyr jaraqattardy emdeýge arnalǵan medıtsınalyq buıymdar óndirisin keńeıtýdi tapsyrdy, dep habarlaıdy DSM baspasóz qyzmeti.
Densaýlyq saqtaý mınıstri Aqmaral Álnazarova Astanadaǵy Halyqaralyq travmatologııa jáne ortopedııa ǵylymı-óndiristik ortalyǵyna baryp, onda synyqtar men aýyr jaraqattardy emdeýge arnalǵan otandyq medıtsınalyq buıymdardyń serııalyq óndirisimen tanysty.
Kásiporynda ámbebap ortopedııalyq qurylǵylar, syrtqy fıksatsııa apparattary, arnaıy quraldar jáne travmatologııa salasyna arnalǵan basqa da buıymdar shyǵarylady. Ónimder memlekettik tirkeýden ótken, al kásiporynnyń ázirlemeleri patenttermen qorǵalǵan.
— Aýyr jaraqat týraly sóz bolǵanda, ýaqyttyń ár mınýty mańyzdy. Dárigerde patsıentke ýaqtyly kómek kórsetý úshin qajetti barlyq qural bolýy kerek. Eger elimizde dárigerlerimizge qajet, tirkelgen, sapaly ári qaýipsiz ónim shyǵarylsa, biz mundaı óndiristi damytýǵa jaǵdaı jasaýymyz qajet, — dep atap ótti vedomstvo basshysy.
Búginde Qazaqstanda túrli medıtsınalyq buıymdar shyǵaratyn 100-den astam óndiristik alań jumys isteıdi. Travmatologııaǵa arnalǵan medıtsınalyq buıymdarǵa erekshe kóńil bólinedi. Otandyq óndiristi damytý medıtsınalyq uıymdardy qajetti ónimdermen turaqty qamtamasyz etýge jáne syrtqy jetkizilimderge táýeldilikti tómendetýge de yqpal etedi. Bul rette medıtsınalyq ónimderge qoıylatyn negizgi talaptar — olardyń sapasy men qaýipsizdigi. Sapardyń qorytyndysy boıynsha mınıstr medıtsınalyq uıymdardyń naqty qajettilikterin eskere otyryp, travmatologııaǵa arnalǵan otandyq medıtsınalyq buıymdar óndirisin keńeıtý jónindegi jeke jospar ázirleýdi tapsyrdy.
Buǵan deıin SQO-da elevatorda aýyr jaraqat alǵan jigit jansaqtaý bóliminde jatqanyn jazǵanbyz.
