«Sınhýa» Ortalyq Azııanyń aqparat agenttikterimen yntymaqtastyqty kúsheıtedi
ASTANA. KAZINFORM — Qytaıdyń «Sınhýa» aqparat agenttigi Ortalyq Azııa elderiniń aqparat agenttikterimen birge jasandy ıntellektke arnalǵan transulttyq jáne transóńirlik zerthanalar qurýǵa, derekter, tehnologııalar jáne qosymshalar almasýdy nyǵaıtýǵa, jańa sapadaǵy medıalyq óndiris kúshterin damytýǵa daıyn. Bul týraly «Sınhýa» bas dırektory Fý Hýa «Qytaı — Ortalyq Azııa» aqparat agenttikteri forýmynda aıtty.
Onyń aıtýynsha, Qytaı men Ortalyq Azııa elderiniń aqparat agenttikteri bedeldi aqparat taratý, zamana aǵynyn baǵamdaý, órkenıetter arasyndaǵy ózara almasýdy ilgeriletý jaǵynan úlken jaýapkershilik arqalaıdy. Osyǵan baılanysty «Sınhýa» basshysy tórt bastama usyndy.
− Eń aldymen Qytaı men Ortalyq Azııa yntymaqtastyǵy tarıhyn birlese baıandaýdy usynamyn. Tóraǵa Sı Tszınpın Qytaı men Ortalyq Azııa týraly áńgimeleýdiń mańyzdylyǵyn atap ótti. Qytaı men Ortalyq Azııa elderiniń qarym-qatynasynyń tarıhı tamyry tereń, keń aýqymdy praktıkalyq qajettilik pen qoǵamdyq qoldaýǵa ıe. Sońǵy jyldary memleket basshylary júrgizip otyrǵan dıplomatııalyq strategııa aıasynda birqatar deklaratsııa men bastamalar júzege asyp, túrli platforma men tetikter nátıjeli jumys isteýde. Bul halyqaralyq qaýymdastyqtyń nazaryn aýdardy. Biz Qytaı men Ortalyq Azııa arasyndaǵy joǵary deńgeıli almasýlardy, joǵary sapaly yntymaqtastyqty, beıbitshilik pen turaqtylyqty birlesip qoldaǵan oqıǵalardy jáne Qytaı men Ortalyq Azııa halyqtarynyń shynaıy ómirin qamtıtyn áńgimelerdi keńinen baıandaýymyz kerek. Osylaısha, Qytaı men Ortalyq Azııanyń oqıǵalary álemge taralady, − dedi Fý Hýa.
Ekinshiden, Qytaı men Ortalyq Azııa arasyndaǵy gýmanıtarlyq almasý men órkenıetter úndesýin birlese ilgeriletý usynyldy.
− Memleketter arasyndaǵy qatynastar halyqtar arasyndaǵy tyǵyz baılanystarǵa táýeldi, al qarapaıym adamdar arasyndaǵy qatynastar — júrekterdiń úndesýine baılanysty. Aqparat agenttikteri órkenıetterdiń úndesýinde jáne halyqtar arasyndaǵy jaqyndasýda úlken ról atqarady. Biz Qytaı men Ortalyq Azııa elderiniń mádenı baılyǵyn tolyq tanystyryp, ádebıet, óner, bilim, jastar salalaryndaǵy almasýlar jetistigin keńinen kórsetip, halyqtar arasyndaǵy ózara túsinistikti tereńdetýimiz qajet, − dedi spıker.
Úshinshiden, medıa tehnologııalar salasyndaǵy ınnovatsııalar men yntymaqtastyqty birlese ilgeriletý aıtyldy. Aqparat agenttikteri ózgerister tolqynyna belsendi túrde beıimdelip, tehnologııalyq jańashyldyq múmkindikterin jiberip almaýy tıis.
− Sońǵy jyldary «Sınhýa» konvergentti medıakontent óndirý boıynsha ulttyq zerthanany damytyp, JI negizindegi kontent generatsııalaý júıesin, ıntellektýaldy stýdııalardy iske qosyp, jańalyq óndirýdiń barlyq kezeńderinde zamanaýı tehnologııalardy keńinen engizip keledi. Biz Ortalyq Azııa elderiniń aqparat agenttikterimen birge medıa salasynda qoldanylatyn jasandy ıntellektke arnalǵan transulttyq jáne transóńirlik zerthanalar qurýǵa, derekter, tehnologııalar jáne qosymshalar almasýdy nyǵaıtýǵa, mobıldi ınternet dáýirinde jańa sapadaǵy medıalyq óndiris kúshterin damytýǵa daıynbyz, − dedi ol.
Tórtinshiden, aqparat agenttikteri arasyndaǵy almasý men yntymaqtastyqty tereńdetý kózdelgen.
− Tóraǵa Sı Tszınpın «Qytaı — Ortalyq Azııa» ekinshi sammıtinde Qytaıdyń Ortalyq Azııa elderiniń BAQ-tarymen jáne saraptamalyq ortalyqtarymen yntymaqtastyqty nyǵaıtatynyn málimdedi. Qytaı men Ortalyq Azııanyń aqparat agenttikteri arasyndaǵy yntymaqtastyqty damytý — jalpy medıayntymaqtastyqtyń mańyzdy bóligi jáne ózara senimdi tereńdetýge, jan-jaqty baılanystarǵa jol ashady. «Sınhýa» Ortalyq Azııa elderiniń aqparat agenttikterimen birge jańalyq almasý, aqparat taratý jáne tehnologııalyq jańashyldyq salalarynda yntymaqtastyqty kúsheıtedi, BAQ pen saraptamalyq ortalyqtar arasyndaǵy kópjaqty almasýdy arttyrady, − dedi «Sınhýa» bas dırektory.
Aıta keteıik, Prezıdent Ortalyq Azııa — Qytaı aqparat quraldarynyń forýmyna quttyqtaý joldady.
QR Prezıdenti teleradıokesheni men «Sınhýa» aqparat agenttigi arasynda yntymaqtastyq týraly Memorandýmǵa qol qoıyldy. Qujatta jańalyq kontentimen almasý, birlesken trenıngter men semınarlar ótkizý, mýltımedıalyq ózara is-qımyldyń jańa formattaryn damytý, sondaı-aq aqparatty ulttyq jáne halyqaralyq deńgeıde ilgeriletý kózdelgen.