Singer-2017 baıqaýy týraly ne bilemiz
ASTANA. QazAqparat - «Singer 2017» realıtı-shoýy Koreıa Respýblıkasy MBC telearnasy «I am singer» ánshiler jarysy realıtı-shoýynyń qytaılyq nusqasy. Án baıqaýy Qytaıdyń Hýnan telearnasynan 2013 jyldan bastap efırde kórsetile bastady. Jobaǵa Qytaı estradasynyń jaryq juldyzdary, sondaı-aq Koreıa, Makao, Gonkong, Sıngapýrdan qytaıǵa aty málim ánshiler shaqyrylatyndyqtan, telejoba elde erekshe tanymaldylyqqa ıe bolǵan.
«I am singer» tele-shoýynyń besinshi maýsymy 2017 jyly Qytaı úkimetiniń Koreı oıyn-saýyq mádenıetine shekteý qoıýy saldarynan «Singer 2017» bolyp ózgertilip, mazmuny jáne baıqaý sharttary jańartyldy.
Jobaǵa jalpy 7 ánshi qatysady. Shaqyrý alǵan ánshiler kelisimge sáıkes jobaǵa qatysýy, baıqaýdyń nátıjesi týraly aqparat quraldaryna aıtpaýǵa, qupııalyqty saqtýǵa kelisim beredi.
«Singer-2017» án baıqaýynyń jarys kestesi
Іrikteý kezeńi 5 aınalymnan, ár aınalym 2 kezeńnen turady (jalpy 10 kezeń). «Jubatý» beldesýi, jartylaı fınal jáne eki kezeńnen turatyn fınalmen jeńimpaz anyqtalady. Fınal tikeleı efırden kórsetilip, irikteý kezeńi aldyn-ala túsirilimnen keıin kórsetiledi.
I aınalym: 21 jáne 28 qańtar.
II aınalym: 4 jáne 11 aqpan.
III aınalym: 18 jáne 25 aqpan.
IV aınalym: 4 jáne 11 naýryz.
V aınalym: 18 naýryz, 25 naýryz.
Jubatý beldesýi: 1 sáýir
Fınal: 8 jáne 15 sáýir kúnderi.
«Singer 2017» qatysýshylaryn baǵalaý
500 tyńdarman sol kezeńdegi eń úzdik ánshini baǵalap, bılet sany eń az bir qatysýshy shyǵarylyp otyrady. Ár aınalymnyń qorytyndysy boıynsha 1-orynnan 7-orynǵa deıin reıtıng qurylyp, jobadan shyǵyp qalǵan 7-oryndaǵy ánshiniń orynyna jańa ánshi qosylady.
«Singer-2017» baıqaýyndaǵy Dımash
Dımash Qudaıbergen jobaǵa qatysý úshin 5 qańtarda Chanshaǵa barǵanyn habarlaǵan edik. Jobany uıymdastyrýshylar 9 qańtarda Qazaqstandyq ánshiniń qatysatynyn jarııalady.
Bastapqy eki kezeńde erekshe talantymen kózge túsken jerlesimiz birinshi kezeńde 27.00%, al ekinshi kezeńde 24.36% daýys jınap, birinshi aınalymnyń qortyndysy boıynsha 25.68% daýyspen bas juldeni enshiledi.
Dımash Qytaıdyń Beıjiń qalasyndaǵy BGTalent (黑金经纪) prodıýserlik ortalyǵymen birge jumys jasaýda. Prodıýserlik ortalyq ánshiniń stıli jáne jobada sátti óner kórsetýine kómektesedi. Al baıqaýdaǵy jeke prodıýseri - Qytaıdaǵy úlken án baıqaýlarynyń qatysýshysy, qandasymyz Araı Aıdarhan.
Aıta keteıik, «Singer-2017» baıqaýynyń 4 kezeńi Astana ýaqytymen 20:30-da efırde kórsetiledi.
