Sıngapýrlyq basylym: Beıjiń kompanııalarǵa AQSh ınvestıtsııasynan abaı bolýdy eskertti
ASTANA. KAZINFORM — Qytaıdyń qarjylyq monıtorıng organdary eldegi birqatar iri ǵylymı-tehnologııalyq kásiporyndardan AQSh ınvestıtsııasyn ruqsatsyz qabyldamaýdy talap etken, bul týraly Lianhe Zaobao basylymy habarlady.
Basylym keltirgen derekke sáıkes, Qytaıdyń Damý jáne reformalar jónindegi ulttyq komıssııasy bastaǵan birqatar retteýshi-baqylaýshy organdary sońǵy ýaqytta keıbir tehnologııalyq kompanııalarǵa naqty ári arnaıy ruqsat berilmegen jaǵdaıda, AQSh-tan ınvestıtsııa tartýǵa bolmaıtynyn eskertken.
Derekkózderdiń aıtýynsha, IPO-ǵa daıyndalyp jatqan jasandy ıntellekt salasyndaǵy qytaılyq Moonshot kompanııasy Damý jáne reformalar jónindegi ulttyq komıssııasynan osy máselege baılanysty nusqaý alǵan. Eldegi taǵy bir AI startap — StepFun kompanııasyna da osyndaı talap qoıylǵan.
Sonymen qatar el bıligi ByteDance kompanııasyna da osyndaı shekteý engizgen. Atap aıtqanda, TikTok-tyń túpki ıesi sanalatyn ByteDance kompanııasynan úkimettiń kelisiminsiz amerıkalyq ınvestorlarǵa burynǵy aktsııalardy qaıta satý mámilesin jasaýǵa jol bermeý talap etilgen.
Sarapshylardyń aıtýynsha, ótken jıyrma neshe jylda Qytaıdaǵy tehnologııalyq startaptardyń damýyna venchýrlik kapıtal aıtarlyqtaı qoldaý kórsetti, al onyń eleýli bóligi AQSh-tan kelgen. Engizilip jatqan jańa shekteý qytaılyq tehnologııalyq kompanııalardyń qarjy kózderinen oqshaýlanýyn údete túsýi múmkin.
Basylymnyń jazýynsha, ótken jyldyń jeltoqsan aıynda Meta kompanııasynyń qytaılyq AI startaby -- Manus-ty satyp alatyny belgili bolǵannan keıin, el bıligi osy mámilege baqylaýdy kúsheıte túsken bolatyn.
Aqparat kózderiniń aıtýynsha, Beıjiń engizip otyrǵan bul shekteýlerdiń basty maqsaty — ulttyq qaýipsizdikke qatysty sezimtal salalarǵa baqylaýdy kúsheıtip, AQSh ınvestorlarynyń tıisti qytaılyq kompanııalarda aktsııalyq úleske ıe bolýyna jol bermeý.
Eske sala keteıik, Qytaı ǵalymdary Aıdan ákelingen úlgilerden buryn ǵylymǵa belgisiz bolǵan eki mıneraldy anyqtady.
