Sıngapýrdyń sý basqarý tájirıbesi Qazaqstanda qoldanylýy múmkin
ASTANA. KAZINFORM — Qazaqstan sý ınfraqurylymyn damytýda Sıngapýr tájirıbesine nazar aýdardy, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Qazaqstandyq delegatsııa Sý resýrstary jáne ırrıgatsııa vıtse-mınıstri Jandos Sálimovtiń jetekshiligimen Sıngapýr Úkimeti uıymdastyrǵan «Qalalyq sý resýrstary men qaldyqtardy turaqty basqarý salasyndaǵy kóshbasshylyq» atty biliktilikti arttyrý baǵdarlamasyna qatysyp jatyr.
Baǵdarlama QR Sý resýrstary jáne ırrıgatsııa mınıstrligi men Singapore Cooperation Enterprise kompanııasy arasynda jasalǵan kelisim aıasynda júzege asyrylýda. Bul kelisimge Sıngapýr Respýblıkasynyń aǵa mınıstriniń Qazaqstanǵa 2026 jylǵy 26 tamyzdaǵy resmı sapary barysynda qol qoıylǵan.
Baǵdarlama aıasynda qazaqstandyq mamandar Sıngapýrdyń sý resýrstaryn keshendi basqarý jónindegi tájirıbesin zerdelep jatyr. Atap aıtqanda, sýdyń ysyrabyn azaıtý, sý resýrstaryn utymdy paıdalaný, sý tasqyny qaýpin basqarý, ekologııalyq turǵydan tıimdi sheshimderdi engizý jáne sý ınfraqurylymyn qalalyq ortaǵa kiriktirý máselelerine basa nazar aýdarylýda. Sondaı-aq Sıngapýrdyń PUB Ulttyq sý agenttigi qyzmetimen tanysyp jatyr.
Budan bólek, baǵdarlama aıasynda zamanaýı tásilder men tehnologııalardyń is júzinde qalaı qoldanylatynyn zerdeleý maqsatynda iri sý sharýashylyǵy nysandaryna barý josparlanǵan.
Baǵdarlamanyń praktıkalyq bóliminen bólek, Sıngapýr Respýblıkasynyń eńbek resýrstary, saýda jáne ónerkásip máseleleri jónindegi memlekettik mınıstri Fý Chesıanmen, Qazaqstan Respýblıkasynyń Sıngapýr Respýblıkasyndaǵy Tótenshe jáne ókiletti elshisi Asqar Quttyqadammen jáne bıznes ókilderimen kezdesýler ótti.
Kezdesýlerde sý salasyn damytý, sý resýrstaryn basqarýdyń zamanaýı tásilderi men ozyq tájirıbelerdi qoldaný máseleleri boıynsha pikir almasyldy. Sonymen qatar Qazaqstan men Sıngapýr arasyndaǵy sý salasyndaǵy yntymaqtastyqty odan ári damytý perspektıvalary talqylandy.
— Baǵdarlama nátıjeleri Qazaqstannyń sý salasyna arnalǵan tehnologııalyq jáne basqarýshylyq sheshimderdi ázirleý kezinde eskeriledi. Atap aıtqanda, sýdyń ysyrabyn azaıtý, tsıfrlandyrý, sý resýrstaryn qaıta paıdalaný jáne sý sharýashylyǵy ınfraqurylymynyń tıimdiligin arttyrý baǵyttaryna basymdyq beriledi, — dedi QR Sý resýrstary jáne ırrıgatsııa vıtse-mınıstri Jandos Sálimov.
Buǵan deıin sıngapýrlyq kompanııa Astanany óńirlik avıatsııalyq habqa aınaldyrý isine atsalysatynyn jazǵanbyz.
