Sıngapýrde ótken Jasóspirimder olımpıadasynda Qazaqstan 205 eldiń ishinde 24-shi oryn aldy
ASTANA. Tamyzdyń 26-sy. QazAqparat - Qazaqstandyq sportshylar Sıngapýrde ótken Jasóspirimderdiń Olımpıadalyq oıyndarynda úsh altyn (ekeýi - komanda qorjynyna, bireýi - aralas «Mıksed Tım» komandasynyń qorjynyna ), eki kúmis jáne eki qola medal jeńip aldy, dep habarlady Týrızm jáne sport mınıstrligi Sport komıtetiniń Shtattyq ulttyq komandalar men sporttyq rezervter dırektsııasynyń baspasóz qyzmetinen.
Budan buryn habarlaǵandaı, alǵash ret ótip otyrǵan Jasóspirimderdiń Olımpıadalyq oıyndarynda Jánibek Qandybaev (grek-rım kúresi), Jazıra Japparova (aýyr atletıka) chempıon atansa, Zýlfııa Chınshanlo (aýyr atletıka), Nursultan Mamaev (taekvando) - «kúmis» medal qanjyǵalady. Al Ahan Baımaǵanbetov (grek-rım kúresi) pen Rýstem Sybaı (aýyr atletıka) qola júldeni qanaǵat tutty.
Beıresmı komandalyq esepte Qazaqstan, Olımpıadaǵa qatysqan 205 eldiń ishinde 24-shi orynǵa taban tiredi. Qazaqstan quramasynyń barlyq músheleri birinshi ret ótip otyrǵan oıyndardyń tarıhyna alǵashqy qatysýshylar retinde qalady, olardyń barlyǵyna Olımpıada uıymdastyrýshylary Sertıfıkattar tabys etti.
Úshinshi altyndy qaraǵandylyq Qaırat Aǵybaev jeńip aldy. Esterińizge sala keteıik, Olımpıada uıymdastyrýshylary konkýrstan tys óner kórsetken «Mıksed Tım» komandasyn jasaqtaǵan bolatyn. Ol komandaǵa óz sport túrlerinde jaqsy reıtıngke ıe sportshylar kirdi. Qazaqstandyq sportshylar jeńil atletıka estafetasynda jáne dzıýdo jarysynda óner kórsetti, atlet qyzdarymyz sátsiz óner kórsetti. Al dzıýdoda 8 birlesken komanda óner kórsetti. Osy komandalardyń jekpe-jeginde «Essen» komandasy jeńiske jetti. Osy jeńiske bizdiń Qaırat Aǵybaev qomaqty úles qosty. Onyń altyn medali Qazaqstan quramasynyń qorjynyna kirgen joq, biraq ózi úshin jáne eli úshin Qaırat altyn medal jeńip aldy - ol Olımpıada chempıony!
Sıngapýrde ótken Jasóspirimder Olımpıadalyq oıyndarynda óner kórsetken Qazaqstan quramasynyń barlyq delegatsııasy tamyzdyń 28-inde Almatyǵa Dýbaıdan «Eır Astana» áýekompanııasy reısimen oralady.
