Sıngapýrda Qazaqstannyń mádenı jáne tabıǵı murasyna arnalǵan kórme ashyldy

NUR-SULTAN. QazAqparat - Qazaqstan Respýblıkasy táýelsizdiginiń 30 jyldyq mereıtoıyn atap ótý aıasynda Sıngapýrda qala turǵyndary men týrıstter arasynda keńinen tanymal «Gardens by the Bay» (Shyǵanaqtaǵy baqtar) saıabaǵynda «Tulipmania 2021» atty taqyryptyq kórme ótýde.

Bul týraly QazAqparat QR Syrtqy ister mınıstrliginiń Telegram kanalyna silteme jasap abarlaıdy.

Saltanatty sharaǵa Sıngapýrdyń parlamenti, akademııalyq jáne iskerlik ortanyń, dıpkorpýstyń, qazaq dıasporasynyń ókilderi men jergilikti azamattar qatysty. Іs-sharanyń qurmetti qonaǵy Sıngapýrdyń Premer-mınıstr keńsesindegi Mınıstr, Ekinshi qarjy mınıstri jáne Ekinshi ulttyq damýdyń mınıstri Indranı Radja boldy.

«Gardens by the Bay» saıabaǵynda ótkiziletin jyl saıynǵy kórme - Sıngapýrdyń mádenı kúntizbesindegi mańyzdy oqıǵa. Elimizdiń mádenı murasy men tabıǵı kórikti jerlerine arnalǵan bıylǵy kórmeniń taqyryby – «Tıýlpanomanııa» kezdeısoq tańdalmady: qyzǵaldaqtardyń otany – qazaq dalasy ekenin biletinder az, ol jerden ejelgi ýaqytta bul erekshe gúl Eýropaǵa ákelinip, keń tanymaldyqqa ıe boldy. Saıabaqtyń atqarýshy dırektory Felıks Loý pandemııa kezindegi qazirgi karantın shekteýlerine qaramastan, baǵalaýlar boıynsha kórmege 100-den 200 myńǵa deıin sıngapýrlyq jáne ózge de sheteldik týrıster keletinine senim bildirdi.

Osyndaı aýqymdaǵy is-shara ekijaqty yntymaqtastyq tarıhynda alǵash ret Sıngapýrda ótkizilip otyr.

Mereıtoılyq oqıǵanyń qurmetine araldyń ortalyq aýdanynda ornalasqan 101 ga alańdaǵy «Gardens by the Bay» saıabaǵynda Uly Jibek jolynyń dástúrli bazarlary qaıta jańǵyrtyldy, Qoja Ahmet ıAsaýı kesenesiniń maketi salyndy, dástúrli qazaq kıiz úıi ornatyldy. Halyqaralyq kórmede usynylǵan túrli etnografııalyq materıaldar, qazaq turmysynyń zattary sol zamannyń rýhyn kóterýge kómektesedi.

Ashylý saltanatynda sóz sóılegen Qazaqstannyń Sıngapýrdaǵy Elshisi Arken Arystanov kórmeniń eki el arasyndaǵy ózara qarym-qatynas jylnamasynda óz izin qaldyratynyna jáne mádenı-gýmanıtarlyq yntymaqtastyqty ilgeriletýge yqpal etetinine, sondaı-aq Jibek jolynyń mańyzdy býyny retinde Qazaqstannyń týrıstik tanymaldylyǵyn, baı mádenı, rýhanı jáne tabıǵı murasy bar el retinde ilgeriletýge mańyzdy úles qosatynyna senim bildirdi.

Kórmeni uıymdastyrýǵa Sıngapýrda turatyn qazaqstandyq dıaspora ókilderi eleýli úles qosty. Іshki jabdyǵy bar qazaq kıiz úıin osy kórme úshin «Sheberler aýyly» otandyq kompanııasynyń mamandary arnaıy jasap, ushaqpen jetkizdi.

Qazaqstandyq mýzykanttardyń oryndaýyndaǵy ulttyq áýender kontserti ashylý saltanatyna qatysqan qonaqtardyń joǵary baǵasyna ıe boldy.

Kórme 14 qarashaǵa deıin jalǵasady.