Sıngapýrda denge bezgeginen ólimniń eń joǵary kórsetkishi tirkeldi
SINGAPÝR. QazAqparat – Tarıhtaǵy denge bezgeginen bolǵan ólim deńgeıiniń eń joǵary kórsetkishi Sıngapýrda tirkeldi, dep habarlaıdy QazAqparat.
The Straits Times basylymynyń jazýynsha, jyl basynan beri 28 adam kóz jumǵan.
Budan bólek, bıyl qalada tropıkalyq bezgek aýrýyn juqtyrýdyń eń joǵary kórsetkishi anyqtaldy. 31 myńnan astam adam tropıkalyq bezgek juqtyrǵan.
Turaqty damý jáne qorshaǵan ortany qorǵaý memlekettik mınıstri Desmond Lıdiń aıtýynsha, «aýrýdyń sharyqtaý shegi shilde aıynda boldy. Ol kezde aptasyna keminde 1,7 myń bezgek juqtyrý oqıǵasy tirkelgen».
Mınıstrdiń aıtýynsha, «qazir bul kórsetkish aptasyna orta eseppen 500 jaǵdaıǵa deıin tómendedi».
Denge – bul tropıkalyq jáne sýbtropıkalyq aımaqtarda basym bolatyn vırýstyq ınfektsııa. Onyń belgileri - dene qyzýynyń kóterilýi, júrek aıný, bórtpe, bas jáne bel aýrýy.
