Sıngapýrda Denge bezgegimen aýyrǵandar 5 ese artty
NUR-SULTAN. QazAqparat – Sıngapýrda Denge bezgegi órship tur. Tamyz aıynyń basynda indetpen aýyrǵandar sany 9 135-ke jetken. Bul, byltyrǵydan bes esege kóp, dep habarlaıdy QazAqparat Strait Times basylymyna silteme jasap.
Eldiń Qorshaǵan orta jónindegi ulttyq agenttigi (NEA) ádette Denge bezgegi maýsym-qazan aılarynda qozatynyn jetkizdi. Agenttik ókilderiniń aıtýynsha, 27 shildege deıingi bir aptanyń ishinde Sıngapýrda 610 adamnyń aýrý juqtyrǵany anyqtaldy.
20 shildedegi málimet boıynsha, bıyl Denge bezgeginen toǵyz adam kóz jumǵan.
Bıyl qańtardan maýsymǵa deıin bezgek taratatyn masalardyń 60 paıyzy turǵyn úılerdi meken tutqan.
Oǵan qarsy kúresý maqsatynda, ótken aıda agenttik arnaıy jobany qolǵa alýdy josparlap otyrǵanyn málimdegen. Onyń aıasynda qorshaǵan ortaǵa sterıldengen masalar shyǵarylyp, sol arqyly mamandar býnaqdenelilerdiń kóbeıýin 90% qysqartýǵa úmitti.
