Sıngapýrda 40 jylda alǵash ret jemqorlyq daýy týyndady
SINGAPÝR. QazAqparat – Saıası turaqtylyǵymen tanylǵan Sıngapýrda el úshin sırek qubylys sanalatyn saıası daý-damaı týyndady, dep habarlaıdy QazAqparat BBC News-ke silteme jasap.
Ótken aptada joǵary shendi mınıstr jemqorlyq isi boıynsha tutqyndaldy. Bul – keıingi 40 jylda elde bolǵan alǵashqy jemqorlyq daýy jáne ol jemqorlyqqa qarsy bedelimen maqtanatyn qala-memlekettiń turǵyndaryn dúr silkindirgen jańalyq boldy.
Ótken aptada Sıngapýrdyń jemqorlyqqa qarsy kúres qyzmeti kólik mınıstri S. Isvaran men mıllıarder Ong Beng Sengany tutqyndady. Ekeýi 2008 jyly Sıngapýrde Gran-prı ótkizýde mańyzdy ról oınaǵan. Tergeý júrip jatqandyqtan Isvarannan mınıstr qyzmetinen ketýi suralǵan.
Reuters dereginshe, 61 jastaǵy Isvaran 2021 jyldyń mamyrynda kólik mınıstri bolǵanǵa deıin 2006 jyly úkimet múshesi atanyp, saýda jáne baılanys mınıstri qyzmetinde bolǵan.
Sıngapýrda mınıstrlerge qatysty jemqorlyq isi sırek kezdesedi. Sebebi, onda memlekettik qyzmetshiler jemqorlyqqa qarsy turýy úshin jaqsy jalaqy tólenedi. Kabınet músheleriniń kóbiniń jyldyq jalaqysy 1 mıllıon sıngapýr dollarynan (750 myń AQSh dollaryna jýyq) asady.
Premer-mınıstrdiń orynbasary Loýrens Vong jergilikti BAQ-qa bergen suhbatynda bul isti tergeý «tolyq ári táýelsiz» bolatynyn, «eshteńe jasyryn qalmaıtynyn» aıtty.
Taǵy bir janjal Sıngapýrdyń saıası sahnasyn osy aptada dúr silkindirdi. Parlament depýtattarynyń romany belgili bolyp, ekeýi de qyzmetinen ketýge ótinish jazdy jáne basqarýshy partııa quramynan da shyqty. Onyń biri – kezinde premer-mınıstrlikke úmitker sanalǵan 54 jastaǵy parlament spıkeri Tan Chýan-Tszın, ekinshisi – áriptesi 47 jastaǵy Cheng Lı Hýeı. Tan myrzanyń áıeli bar ekeni belgili, al Cheng hanym turmysta emes.
Sarapshylardyń pikirinshe, biriniń artynan biri bolyp jatqan daý-damaı 1959 jyldan beri bılik basynda otyrǵan jáne parlamenttiń basym bóligin quraıtyn Halyqtyq áreket basqarýshy partııasynyń bedeline nuqsan keltirýi múmkin.
