Sıngapýr týý kórsetkishin arttyrý úshin ár balaǵa 55 myń dollar tóleıdi
ASTANA.KAZINFORM — Sıngapýr týý deńgeıiniń kúrt tómendeýine baılanysty otbasylardy qoldaýdyń jańa sharalaryn qabyldady. Úkimet ár balaǵa týǵannan 17 jasqa deıin kómek retinde shamamen 70 myń Sıngapýr dollaryn (shamamen 55 myń AQSh dollary) bólýdi josparlap otyr, dep habarlaıdy Financial Review.
Sıngapýr premer-mınıstri Loýrens Von halyqqa joldaýynda balalarǵa arnalǵan járdemaqy men ata-ana demalysy júıesin qaıta qaraýdy jarııalady.
Baǵdarlama boıynsha árbir jańa týǵan Sıngapýr azamaty bir rettik tólem retinde 10 myń Sıngapýr dollaryn (shamamen 7800 AQSh dollary) alady. Úkimet keıinnen otbasylarǵa qosymsha qoldaý sharalaryn usyndy, bul 17 jasqa deıingi árbir balaǵa shaqqandaǵy kómektiń jalpy somasyn shamamen 70 myń Sıngapýr dollaryna deıin jetkizedi.
Bılik bala kútimi men mektepke deıingi bilim berýdi qoljetimdi etýdi, ata-ana demalysyn qoldaýdy keńeıtýdi jáne otbasylardyń turǵyn úı jaǵdaılaryn jaqsartýdy kózdeıdi. Balaly otbasylarǵa memlekettik turǵyn úıge qol jetkizýdiń qosymsha múmkindikteri beriledi.
Úkimettiń maqsaty tek qarjylyq kómek kórsetý ǵana emes, sonymen qatar otbasylarǵa qolaıly orta jasaý.
Sıngapýrda jalpy týý kórsetkishi (JTK) bir áıelge shaqqanda rekordtyq 0,87 balaǵa deıin tómendep ketken. Halqy 6 mıllıonnan sál ǵana asatyn bul el Ońtústik Koreıanyń álemdegi eń tómengi 0,8 kórsetkishine jaqyndap keledi. Demograftardyń pikirinshe, taza ımmıgratsııa bolmaǵan jaǵdaıda turaqty halyq sanyn saqtaý úshin 2,1 shegi qajet.
Buǵan deıin Japonııada týý kórsetkishi eń tómen deńgeıge túskeni habarlandy.
