Sıngapýr stratosferaǵa basqarylatyn áýe sharyn ushyrmaq
ASTANA. QazAqparat - Sıngapýr aǵymdaǵy jyldyń mamyr aıynda 19 km bıiktikten basqarylatyn áýe sharyn ushyrýdy josparlap otyr. Bul jaıly jergilikti In.Genius kompanııasynyń basshysy Lım Sen málimdedi, dep habarlaıdy TASS.
Lım Senniń sózine qaraǵanda, áýe sharymen ushatyn ushqysh belgili, tek ázirshe onyń esimi qupııa saqtalyp otyr. Sharǵa Aýstralııanyń Alıs Sprıngs qalasynan «start beriledi».
Sharǵa ornatylǵan, qalypty qysym men 28 gradýstyq temperatýra jaǵdaıyn, sondaı-aq bý-gaz ekzemasyna shaldyǵýdan saqtaıtyn arnaýly kapsýla - stratostat pılottyń «Armstrong sheginen» de bıikke shyǵýyna, ıaǵnı teńiz deńgeıinen 19200 metr kóterilýine múmkindik beredi.
Sıngapýr mamandary osy jobany iske asyrýǵa 2013 jyly kirisken. O basta ony 2015 jyly Sıngapýrdyń 50 jyldyǵyna oraı ushyrý josparlanǵan edi. Biraq kompanııa stratostatty belgilengen merzimde jasap shyǵara almady. Onyń ústine azamattyq avıatsııa basqarmasy da buǵan ruqsat bermegen.
Keıin, 2016 jyly kompanııa Alıs-Sprıngsten ushqyshsyz shardy sátti ushyrdy. Sol kezde shar Jer betinen (teńiz deńgeıinen) 30 km bıiktikke deıin kóterilgen edi. Budan tys, stratosferaǵa tyshqandardy ushyrý eksperımenti de sátti aıaqtaldy: kemirgishter ǵaryshpen shektesetin ozonosferada 110 mınýt ótkizdi.
Joba quny qupııa kúıinde qalyp otyr. Degenmen, 2014 jyly jergilikti BAQ-qa bergen suhbatynda In.Genius basshysy 7,6 mln AQSh dollary shamasynda qarjy jumsalǵanyn aıtqan bolatyn.
