Sıngapýr stılindegi múldem jańa ári ıntegratsııalanǵan megapolıs salýǵa nıettimiz — Toqaev
SINGAPÝR. KAZINFORM — Prezıdent Alatau City jobasyn júzege asyrý máseleleri boıynsha kezdesý ótkizdi.
Qazaqstan-Sıngapýr bıznes forýmy aıasynda Almaty oblysyndaǵy asa iri Alatau City jobasyn iske asyrýdyń mańyzdy aspektileri talqylandy.
Kezdesýge Surbana Jurong kompanııalar tobynyń bas dırektory Shon Chao, Asia Infrastructure Solutions Singapore kompanııasynyń tóraǵasy jáne Temasek Trust kompanııasynyń dırektory Hean Faın Vong, China Development Institute kompanııasynyń vıtse-prezıdenti Tszıan Tsıý, KPMG ASPAC memlekettik sektorynyń basshysy Maıkl Kamerlengo, Kuok Singapore kompanııasynyń tóraǵasy Hýn In Kýok, Boustead Singapore Ltd kompanııalar tobynyń tóraǵasy jáne bas dırektory Fong Fýeı Vong, KPMG Korea seriktesi Mýngý Park, Samsung C& T Engineering and Construction Group kompanııasynyń vıtse-prezıdenti ıÝng-Výk Kım, Kuok Group kompanııasynyń qarjy dırektory jáne Allgreen Properties kompanııasynyń bas dırektory Leong Che Tho, Caspian Group kompanııasy Dırektorlar keńesiniń tóraǵasy ıÝrıı Tshaı, sondaı-aq Qazaqstan delegatsııasynyń resmı ókilderi qatysty.
Qasym-Jomart Toqaev áleýetti seriktesterge iltıpat bildire otyryp, Alatau City jobasy Qazaqstannyń ǵana emes, búkil Ortalyq Azııa óńiri ekonomıkasynyń katalızatory retinde mańyzdy sanalatynyn atap ótti.
Memleket basshysy bul jobany iske asyrý máselesi Sıngapýr Prezıdentimen jáne Premer-mınıstrimen júrgizilgen kelissóz barysynda talqylanǵanyn aıtty.
— Biz Sıngapýr stılindegi múldem jańa ári ıntegratsııalanǵan megapolıs salýǵa nıettimiz. Ol álemdik standarttarǵa saı keletin jetekshi halyqaralyq iskerlik habqa aınala alady. Jan-jaqty oılastyrylyp jobalanǵan ınfraqurylym, úı salý kezinde ınnovatsııalyq tehnologııalardy paıdalaný jáne perspektıvti salalarǵa basa mán berý — osynyń bári ornyqty damý jobasy retinde Alatau Sity qurylysynyń sátti iske asýyna úles qosatyn asa mańyzdy elementter. IT, startaptar, zertteýler men ázirlemeler, turaqty óndiris, jańartylatyn energııa kózderi, agrobıznes, densaýlyq saqtaý sııaqty ınnovatsııalyq sektorlardyń damýy resýrs tutynýǵa negizdelgen dástúrli salalardan bas tartýdyń aıqyn kórinisi bolýǵa tıis. Jasyl, ornyqty ári ınklıýzıvti qala qurý, álbette, saıası jaǵynan úzdiksiz úılestirýdi jáne ınvestıtsııaǵa qolaıly jaǵdaı jasaýdy qajet etedi. Sondyqtan Qazaqstan Úkimeti aýdany myń sharshy kılometrge jýyq Alatau arnaıy ekonomıkalyq aımaǵyn qurdy, — dedi Memleket basshysy.
Qasym-Jomart Toqaev jobanyń keshendi josparyn ázirlegeni úshin sıngapýrlyq Surbana Jurong kompanııasyna alǵys aıtty.
Sondaı-aq bul bastamanyń áleýeti zor ekenine senim bildirip, Sıngapýr bıznesiniń ókilderin osy jobaǵa belsendi qatysýǵa shaqyrdy.
Almaty oblysynyń ákimdigi Caspian Group aktsıonerlik qoǵamymen jáne Surbana Jurong kompanııasymen birlesip, óńirde G4 City qalasyn damytý jónindegi Bas jospardyń tujyrymdamasyn daıyndady.
Bıyl qańtar aıynda Memleket basshysynyń Jarlyǵymen Іle aýdanynda oblystyq mańyzy bar Alataý qalasy quryldy.
Úkimet Alataý qalasynyń Bas josparyn bekitip, Іle, Talǵar aýdandary men Qonaev qalasynyń shekaralaryn ózgertti.
Sondaı-aq Prezıdent G4 City arnaıy ekonomıkalyq aımaǵynyń aýmaǵyn 30 myń gektardan 96,5 myń gektarǵa deıin ulǵaıtyp, onyń ataýyn Alatau arnaıy ekonomıkalyq aımaǵy dep ózgertý týraly sheshimdi maquldady.
