Sıngapýr, Serbııa, Úndistan, Mysyr jáne Izraıl EAEO-men erkin saýda aımaǵyn qurmaq
Bul týraly búgin «Ideıadan - shynaıy bolmysqa: Nursultan Nazarbaevtyń eýrazııalyq bastamasyna 25 jyl» atty halyqaralyq ǵylymı-tájirıbelik konferentsııa barysynda Senat depýtaty Serik Bekturǵanov aıtty, dep habarlaıdy QazAqparat tilshisi.
«Qazirgi álemdegi iri ıntegratsııalyq birlestik retinde EAEO-ny qurý shamamen 170 mln adam turǵyny bar ǵalamshardaǵy úlken tutynýshylyq naryqtardyń birin qalyptastyrýǵa múmkindik berdi. Búgingi baǵalaýǵa sáıkes jalpy quny 40 trln dollardy quraıtyn álemdegi barlanǵan paıdaly qazbalardyń shamamen shıregi qatysýshy elderdiń úlesine tıesili. EAEO sonymen qatar álemdegi energııa resýrstary men azyqtyq bıdaıdy eksporttaýshylardyń biri. Birlestik ózin atalǵan resýrstarmen tolyqtaı qamtamasyz etip otyr jáne ortaq naryqtyń ishindegi qajetti kommýnıkatsııalarǵa ıelik etedi», - dedi Senat depýtaty.
Onyń atap ótýinshe, ıntegratsııalyq birlestik halyqaralyq qoǵamdastyq tarapynan moıyndalyp, EAEO-men saýda-ekonomıkalyq yntymaqtastyqty keńeıtýge birqatar memleket múddelik tanytyp otyr. Vetnammen erkin saýda aımaǵy qurylǵan. Dál osyndaı jumys Iranmen júrgizilip jatyr. Qytaımen saýda-ekonomıkalyq yntymaqtastyq týraly kelisim rásimdelgen.
«Erkin saýda aımaǵyn qurý baǵytyndaǵy jumystar Sıngapýr, Serbııa, Úndistan, Mysyr jáne Izraılmen júrgizilip jatyr», - dedi ol.
Sondaı-aq senator Mońǵolııa, Chılı, Perý, Sıngapýr, Kambodja syndy eldermen EAEO arasyndaǵy yntymaqtastyq jáne ózara is-qımyl týraly 25-ten astam memorandýmǵa qol qoıylǵanyn aıtty.