Sıngapýr Saǵyntaevtyń kelgenin kútip otyr - elshi Úsen Súleımen
ASTANA. QazAqparat - Kelesi jyly Sıngapýr men Qazaqstan arasynda vızasyz rejım engizilýi ábden múmkin. QR Premer-Mınıstri Baqytjan Saǵyntaevtyń osy elge jasaıtyn resmı sapary barysynda basqa da úkimetaralyq qujattar rásimdeledi, dep habarlaıdy QazAqparat tilshisi.
Qazaqstannyń Sıngapýrdaǵy Tótenshe jáne Ókiletti elshisi Úsen Súleımenniń aıtýynsha, qazirgi kezde ózara ınvestıtsııalardy qorǵaýǵa qatysty kelisim daıyn. "Olar atalǵan qujatqa qazir-aq qol qoıýǵa daıar. Biraq bizdiń Premer-Mınıstrimiz Saǵyntaev myrza resmı saparmen kelgenshe kútemiz deıdi. Atalǵan sapar kelesi jyldyń naýryz-sáýir aılaryna belgilenip otyr. Qazirgi kezde biz sonyń barlyǵyn pysyqtap jatyrmyz. Úkimet basshysy resmı saparmen kelgende 30 kúnge deıin vızasyz rejımdi engizý týraly kelisim de rásimdeletin shyǵar", - dedi Ú.Súleımen búgin Astanada ótken baspasóz máslıxatynda.
QR Premer-Mınıstri Baqytjan Saǵyntaevtyń Sıngapýrdaǵy resmı sapary aıasynda úlken bıznes-forýmdy uıymdastyrý josparlanǵan. Elshiniń sózine qaraǵanda, forýmnyń taqyryby da daıyn. Negizgi maqsat - eki eldiń ınvestıtsııalyq áleýetin barynsha kórsetý. "Bizdiń jaqtan 150-200 kásipker qatysatyn shyǵar. Al "Samuryq-Qazyna" qory, "Báıterek" xoldıngi, "Kazakh Invest" ulttyq kompanııasy, "Atameken" palatasy elimizde bıznes úshin jasalyp jatqan jaǵdaılar jaıynda aıtyp berse, áriptestik baılanystardy kúsheıtýge bolatyn edi. Olar da eń myqty degen 200 kompanııany alyp kelmekshi. Negizgi maqsattary - naqty jobalardy iske asyrý", - dep atap kórsetti Ú.Súleımen.
