Sıngapýr is boıynsha tárkilengen 2,3 mlrd dollarlyq aktıvterin satpaq

ASTANA. KAZINFORM — Sıngapýrda tarıhta aqshany jylystatý boıynsha eń iri isine qatysýshylardan tárkilengen sándi zattar men baǵaly metaldar satylady, dep habarlaıdy The Straits Times. 

Sıngapýr polıtsııasynyń málimdeýinshe, ol 12 tamyzda aqshany jylystatý isi boıynsha 466-dan astam sándi zattar men 58 altyn quımalaryn qamtıtyn qolma-qol aqshasyz aktıvterdi basqarý jáne joıý úshin Deloitte & Touche Financial Advisory Services konsaltıngtik kompanııasyn jaýapty etip taǵaıyndady.

Satylymǵa Patek Philippe jáne Richard Mille saǵattary, gaýhar tasty zergerlik buıymdar, Hermes jáne Louis Vuitton sómkeleri, sondaı-aq árqaısysynyń salmaǵy 999 g pen 1 kg aralyǵyndaǵy altyn quımalary kshyǵarylady. Aktıvterdiń bir bóligi, sonyń ishinde jyljymaıtyn múliktiń 54 nysany 2024 jyly satylǵan.

Deloitte aýktsıondar men tikeleı kelisimsharttardy qamtýy múmkin aktıvterdi satý boıynsha usynystar shyǵarady. Úkimet bekitkennen keıin túsken qarajat memlekettik shyǵyndardy qarjylandyratyn Sıngapýrdyń Shoǵyrlandyrylǵan qoryna túsedi.

Kúdiktilerdi ustaý boıynsha keń aýqymdy arnaıy operatsııa 2023 jyldyń 15 tamyzynda júrgizildi. Reıdter barysynda onlaın alaıaqtyq jáne zańsyz qumar oıyn oınaýmen aınalysqan 10 adam ustaldy. Taǵy 17 kúdikti jyljymaıtyn múlik, avtokólikterin jáne basqa da qundylyqtaryn qaldyryp, elden shyǵyp úlgergen.

2024 jyly barlyq 10 tutqyn kináli dep tanylyp, aqshany jylystatý, qujattardy qoldan jasaý jáne qamaýǵa alýǵa qarsylyq kórsetkeni úshin 13-17 aıǵa bas bostandyǵynan aıyryldy. Jazasyn ótegen soń olar jer aýdarylyp, ómir boıyna elge kirýge tyıym salyndy.