Sıngapýr Prezıdenti Qasym-Jomart Toqaevty memlekettik saparmen kelýge shaqyrǵanyn qýattady
SINGAPÝR. QazAqparat – Sıngapýr Prezıdenti Halıma ıAkob Qazaqstannyń Memleket basshysy Qasym-Jomart Toqaevty óz eline memlekettik saparmen kelýge shaqyrǵanyn qýattady. Bul týraly ol Qazaqstan Elshisi Asqar Quttyqadamnan senim gramotalaryn qabyldaǵannan keıingi kezdesýde aıtty, dep habarlaıdy QazAqparat.
«Istana» prezıdent saraıynda ótken saltanatty rásimnen keıingi kezdesýde qazaqstandyq dıplomat Sıngapýr kóshbasshysyna Qazaqstan Respýblıkasynyń Prezıdenti Qasym-Jomart Toqaevtyń izgi tilekterin jetkizgen.
«Astananyń saýda-ekonomıkalyq, saıası jáne mádenı-gýmanıtarlyq salalardy qosa alǵanda, keń aýqymdy baǵyttar boıynsha qala-memleketpen qatynastardy odan ári keńeıtýge zor múddeliligi rastaldy.
Taraptar ekijaqty ózara tıimdi áriptestik eki elde bolyp jatqan tereń transformatsııa protsesteri, sondaı-aq halyqaralyq jaǵdaıdyń qubylmalylyǵynyń artýy aıasynda erekshe mańyzǵa ıe bolatynyna kelisti», - delingen Qazaqstan Syrtqy ister mınıstrliginiń málimetinde.
Sıngapýr Prezıdenti sońǵy saılaýda Prezıdent Q.Toqaevtyń jeńiske jetýine oraı jyly lebizin bildirip, qazaqstandyq áriptesine Sıngapýrǵa memlekettik saparmen kelýge shaqyrǵanyn qýattady.
Eske salaıyq, Qasym-Jomart Toqaevtyń Sıngapýrǵa sapary josparlanyp otyrǵanyn buǵan deıin jazǵan bolatynbyz.
Foto: gov.kz
