Sıngapýr Olımpıadasyndaǵy júldegerlerimizdiń alǵashqy toby Almatyǵa oraldy
ALMATY. Tamyzdyń 23-i. QazAqparat /Erbol Turymbetov/ - Búgin tań erteń Almatyǵa Sıngapýr Olımpıadasyndaǵy júldegerlerimizdiń alǵashqy toby qaıtyp oraldy,
dep habarlaıdy QazAqparat.
Elimizdiń jastar quramasyndaǵy ziltemirshiler Zúlfııa Chınshanlo men Rústem Sybaı aýyr atletıkadan QR-nyń bas bapkeri Alekseı Nımen birge tań ata Almaty áýejaıyna kelip qondy. Olımpıada juldyzdaryn áýejaıda QR Aýyr atletıka qaýymdastyǵy ókilderi men aýyr atletıkadan Azııa chempıony Baqyt Ahmetov jáne BAQ ókilderi saltanatpen qarsy aldy.
«Bizdiń ziltemirshi atletterimiz jaqsy óner kórsetti dep baǵalaımyn. Mundaı jetistikke jetemiz dep oılamaǵan edik. Bizdiń alǵa qoıǵan maqsatymyz tek Olımpıadaǵa baryp tanysyp qaıtý bolatyn. Biraq júldeli orynǵa múmkindik bolǵan soń barymyzdy salyp, nátıjesinde úsh atletimiz de júldeli qaıtty. Bul bizdiń alǵashqy qadamymyz. Aldaǵy ýaqytta áli talaı júldelermen oralamyz», dedi Alekseı Nı. Sonymen birge, bas bapker Olımpıadanyń joǵary deńgeıde uıymdastyrylǵanyn atap ótti.
Qalǵan jeńimpazdar men basqa da atletter osy aıdyń 28-i kúni elge oralady.
