Sıngapýr Qazaqstanǵa ınvestıtsııany tıimdi basqarýdyń tájirıbesin usynbaq
Búgin Májilistiń jalpy otyrysynda «Qazaqstan Úkimeti men Sıngapýr Úkimeti arasyndaǵy Investıtsııalardy kótermeleý jáne ózara qorǵaý týraly kelisimdi ratıfıkatsııalaý týraly» Zańy qabyldandy, dep habarlaıdy Kazinform.
Kelisimge 2018 jylǵy 21 qarashada qol qoıyldy.
«Investıtsııalyq yntymaqtastyq eki el arasyndaǵy ekonomıkalyq baılanystardy nyǵaıtýdyń mańyzdy aspektisi sanalady. Sıngapýr Qazaqstannyń Ońtústik-Shyǵys Azııadaǵy jetekshi seriktesteriniń biri jáne álemdegi mańyzdy qarjylyq habtardyń birine aınalǵan. Qazir ınvestıtsııa salasynda ekijaqty qarym-qatynastar belsendi damyp keledi», - dedi Syrtqy ister mınıstriniń orynbasary Nazıra Nurbaeva.
Onyń sózine qaraǵanda, Qazaqstan ekonomıkasyn damytý úshin Sıngapýr ınvestıtsııany tıimdi basqarýdyń tájirıbesi men tehnologııasyn usyna alady. Bul qujat aıasynda ınvestorlardyń halyqaralyq quqyqtyq kepildikterin qamtamasyz etý eskerilgen.
«Atap aıtqanda, kelisim ınvestıtsııalyq qyzmetti júzege asyrý kezinde ınvestorlardyń quqyqtarynyń kepildikterin bekitý arqyly yntymaqtastyqtyń quqyqtyq negizin qurýdy qarastyryp otyr. Qujat ratıfıkatsııalanǵan jaǵdaıda, ony iske asyrý teris áleýmettik-ekonomıkalyq nemese quqyqtyq saldarǵa ákep soqpaıdy jáne respýblıkalyq bıýdjetten qosymsha qarjylyq shyǵyndardy talap etpeıdi», - dedi mınıstrdiń orynbasary.
