Sıngapýr dollary kúrt quldyrady
ASTANA. QazAqparat - Sıngapýrlyq dollar qunsyzdandy. Álemde valıýtalyq ahýaly turaqty dep sanalyp kelgen Sıngapýr ulttyq aqsha baǵamyn retteý saıasatyn álsiretip, aqshanyń quldyraýyna jol berdi, dep habarlaıdy 24.kz.
Sıngapýrlyq dollar baǵamy sońǵy 3 jylda eń tómengi deńgeıge deıin tústi. Buǵan deıin ol ár ýaqytta da turaqtylyǵymen erekshelengen bolatyn. Tipti, 2010 jyldyń ortasynda valıýtalyq jup AQSh dollary men Sıngapýr dollary ósýdiń joǵary shegine jetken edi. Qazirgi baǵamnyń tómendeýi Ońtústik-Shyǵysazııalyq memlekettegi ımportqa táýeldi kompanııalarǵa teris áser etkeli tur. Endi AQSh, Avstralııa sekildi elderden ákelinetin zattardyń baǵasy áldeqaıda qymbatqa túsedi. Sonymen qatar shetelde oqyp júrgenderge biraz qıyndyq týady. Degenmen, ulttyq valıýta baǵamynyń tómendeýi eldegi eksport jáne týrızm salasyna ońdy ózgerister ákeledi degen pikir týyndaýda. Al AQSh-tyń qor naryǵyndaǵy kompanııalardyń boljamy qýantarlyqtaı emes. Amerıkalyq mamandardyń málimdeýinshe, halyqaralyq valıýta naryǵyndaǵy jaǵdaı birshama ýshyǵýy múmkin. Tipti, áıgili Apple kompanııasy ótken jyldy joǵary tabyspen aıaqtasa da, aktsııalarynyń baǵasy edáýir tómendedi. Al ınvestorlar AQSh dollarynyń qymbattap, basqa elderdiń valıýtalary quldyraǵan mundaı jaǵdaıda amerıkalyq eksporttaýshylardyń kiris ósimi uzaqqa barmaıtynyn jaqsy bilip otyr.
