Sıngapýr bızneske jasandy ıntellektini engizý úshin tórt ulttyq bastamany iske qosty
ASTANA. KAZINFORM — Sıngapýr bıznes salasynda jasandy ıntellekt (JI) tehnologııalaryn engizý jáne keńinen qoldaný maqsatynda tórt ulttyq bastamany iske qosty. Bul týraly The Straits Times basylymyna silteme jasaǵan Kazinform agenttiginiń Beıjińdegi menshikti tilshisi habarlady.
Sıngapýr premer-mınıstriniń orynbasary Gan Kım ıÝn jańa jobalardy seısenbi kúni Sıngapýrdyń ınnovatsııalar men tehnologııalar aptalyǵynyń ashylý saltanatynda jarııalady. Bastamalar JI tehnologııalaryn ozyq óndiris, qarjy, densaýlyq saqtaý jáne logıstıka salalaryna engizýge baǵyttalǵan buryn qabyldanǵan ulttyq baǵdarlamalardyń jalǵasy sanalady.
— Jasandy ıntellekt eńbek ónimdiligin arttyrýǵa, jańa ónimder men tehnologııalardy ázirleýge múmkindik beredi, — dedi ol quttyqtaý sózinde.
Negizgi bastamalardyń biri — EnterpriseSG agenttiginiń jetekshiligimen júzege asatyn Champions of AI jobasy. Oǵan DBS, Singapore Airlines jáne Singtel sekildi iri kompanııalardy qosa alǵanda, 24 kásiporyn qatysady. Joba aıasynda kompanııalarǵa tsıfrlyq transformatsııanyń jeke josparlary usynylyp, sarapshylardyń qoldaýy kórsetiledi. Sondaı-aq qyzmetkerlerdiń biliktiligin arttyrýǵa jáne olardy jańa daǵdylarǵa úıretýge kómek beriledi.
Shaǵyn jáne orta bıznes ókilderine jasandy ıntellekt agentterin engizýge arnalǵan praktıkalyq semınarlar uıymdastyrylady. Mundaı agentter belgili bir mindetterdi óz betinshe oryndap, derbes sheshim qabyldaı alady. Pılottyq joba aıasynda satylym men marketıngke arnalǵan ıntellektýaldy quraldardy 280-nen astam kompanııa synaqtan ótkizip úlgergen.
Budan bólek, Catalytic AI Solutions jáne MARVEL-AI jobalary iske asyrylady. Olar logıstıka men saýda salalaryndaǵy úderisterdi ońtaılandyrýǵa, sondaı-aq jasandy ıntellekt pen avtomattandyrýdyń kómegimen ozyq materıaldardy ázirleýdi jedeldetýge baǵyttalǵan.
Buǵan deıin sheteldik ınvestor Astanany bolashaqta Dýbaı men Sıngapýr deńgeıine kóterilýi múmkin qala retinde ataǵany habarlanǵan edi.
Eske sala keteıik, buǵan deıin Sıngapýrdyń sý basqarý tájirıbesi Qazaqstanda qoldanylýy múmkin ekenin jazdyq.
