Sıngapýr AQSh pen keıbir Eýropa elderiniń vaktsınalanǵan týrısteri úshin shekarasyn ashty

SINGAPÝR. TASS-QazAqparat – Sıngapýr bıligi seısenbiden bastap Eýropanyń birqatar elinen, sondaı-aq Kanada men AQSh-tan keletin vaktsınalanǵan saıahatshylarǵa arnalǵan dálizdi iske qosty, dep habarlaıdy QazAqparat TASS agaenttigine silteme jasap.

Buǵan deıin kelý kezinde karantındi alyp tastaıtyn jeńildetilgen kirý erejelerin kólik mınıstri S.Isvaran aıtqan bolatyn.

«Bul baǵdarlama Ulybrıtanııa, Danııa, Ispanııa, Italııa, Kanada, Nıderlandy, AQSh jáne Frantsııa turǵyndary úshin jaramdy, olar Dúnıejúzilik densaýlyq saqtaý uıymy maquldaǵan vaktsınalardyń eki dozasyn alǵandar bolýy kerek, karantınde bolýdan bosatylady, elge kirýge ruqsat beriledi», - dedi vedomstvo basshysy. Bul rette Sıngapýr vaktsınatsııa týraly tsıfrlyq sertıfıkatty ǵana tanıdy.

Bılik sonymen qatar 19 qazannan bastap Sıngapýrǵa kirý úshin talap etiletin PTR testileriniń sanyn tórtten ekige deıin qysqartty. Birinshi test shekaradan ótkenge deıin 48 saǵat buryn, al ekinshisi respýblıkaǵa kelgennen keıin birden tapsyrylýy tıis.

Sıngapýr bıligi ótken jyldyń naýryz aıynda sheteldikter úshin shekarany tolyǵymen japqan bolatyn. Keıinnen epıdemıologııalyq jaǵdaıǵa baılanysty jekelegen elder men aýmaqtar úshin shekteýler alynyp tastaldy. Sonymen, qazir respýblıkaǵa mindetti karantınsiz jáne vaktsınasyz kirýge tek materıktik Qytaı, sondaı-aq Gonkong, Makao jáne Taıvan turǵyndaryna ruqsat etilgen.