Sındzo Abe úshinshi ret Japonııanyń premer-mınıstri bolyp saılandy
TOKIO. QazAqparat - Beısenbi kúni Sındzo Abe Japonııa Lıberal-demokratııalyq partııasynyń saılaýynda jeńiske jetip, eldiń premer-mınıstri laýazymyn saqtap qaldy. Abe bul qyzmetke úshinshi ret saılanyp otyr, dep habarlaıdy QazAqparat Kyodo saıtyna silteme jasap.
Abe óziniń jalǵyz qarsylasy, burynǵy qorǵanys mınıstri Sıgerý Isıbany (254 daýys) basyp ozyp, 553 daýys jınady.
Abe saılaýdan keıin birden qyzmetine kiristi. Ol Konstıtýtsııaǵa nazar aýdaratyn ýaqyt kelgenin, tabıǵı apattyń aldyn alatyn jańa sharalar jasaý kerektigin, sondaı-aq dıplomatııaǵa kóńil bólý qajettigin atap ótti.
Budan bólek, Sındzo Abe úkimette jáne partııa basshylyǵynda aýys-túıis júrgizýdi josparlap otyr.
Premer-mınıstr bul máselelermen BUU Bas Assambleıasynyń otyrysyna qatysyp kelgennen keıin, qyrkúıektiń sońynda aınalyspaq.
Abe eldiń premer-mınıstri qyzmetine 2012 jyly saılanǵan edi, 2015 jyly ol qaıta saılandy. Eger Abe Japonııanyń úkimet basshysy laýazymynda 2021 jyldyń qyrkúıegine deıin qalsa, ol osy qyzmette eń uzaq otyrǵan saıasatker retinde tarıhta qalady.
Qazirgi tańda bul rekord Japonııanyń 11-shi premer-mınıstri bolǵan Taro Katsýraǵa tıesili. Ol bılikte 2 886 kún otyrǵan.
