«Sincere Systems Group» qarjy pıramıdasyn uıymdastyrýshylar ustaldy

ASTANA. KAZINFORM – Qarjy monıtorıngi agenttigi (QMA) Qaraǵandy oblysy boıynsha departamenti «Sincere Systems Group» qarjy pıramıdasynyń qurylymdyq bólimshesin basqarý faktisi boıynsha sotqa deıingi tergep-tekserý júrgizip jatyr.

Pıramıdanyń uıymdastyrýshylary ózderin Ulybrıtanııadan kelgen kompanııa ókilderi retinde kórsetip, azamattarǵa ártúrli kommertsııalyq baǵyttarǵa, sonyń ishinde medıtsınalyq kannabısti ósirý jáne jahandyq satylymǵa ınvestıtsııa salýdy usynǵan.

Klıentterdiń senimin arttyrý úshin jeke kabınetteri bar saıt qurylǵan. Onda paıdalanýshylar ishki SWP jáne SWCT tokenderi arqyly esepshottaryn tolyqtyryp, fıattyq aqshaǵa aıyrbastaǵan.

Kúdiktiler túsken qarjyny jeke maqsattaryna paıdalanǵan.

Keltirilgen jalpy shyǵyn 52 mln teńgeden asty.

Sot sanktsııasymen kúdiktilerdiń 76 mln teńge turatyn múlkine: Temirtaý qalasyndaǵy jer ýchaskesi men kempıngke, Astana qalasyndaǵy páter men avtoturaqqa tyıym salyndy.

Kúdiktilerdiń biri úıqamaqqa alynǵan, ekinshisi — elden shyqpaý týraly qolhatpen bosatylǵan.

Sotqa deıingi tergep-tekserý aıaqtalyp, is materıaldary tanysý úshin berildi.

Aıta keteıik, Agenttikte qarjy pıramıdalarynyń belgilerin tekserýge múmkindik beretin «Baiqa, piramida!» Telegram-boty iske qosýly.

Osyǵan deıin QMA úsh jylda 800-den astam avtokóliktiń zańsyz tirkelgenin anyqtaǵany týraly jazdyq.