Synama, salyq, salmaq, paıda: Altyn quıma alýshylar neni bilýi kerek
ASTANA. KAZINFORM – Altyn quımany el azamattaryna satý jobasy 2017 jyldan beri júzege asyrylyp keledi. Tájirıbe kórsetkendeı, altynǵa ınvestıtsııa salýǵa yntalylar az emes. Osy oraıda, Ulttyq bankten alynǵan derekter negizinde altyn quıma alatyn adam bilýi tıis málimetter toptamasyn ázirledik.
Quımanyń 5 túri bar
Affınırlengen altyn quımalar salmaǵyna qaraı bes túrge bólinedi: 5 gramm, 10 gramm, 20 gramm, 50 gramm jáne 100 gramdyq.
Tek joǵary synamada satylady
Barlyq ólshengen quımada baǵaly metaldyń quramy – 99,99%, ıaǵnı synamasy – 999,9.
Qaptamasyn ashýǵa bolmaıdy
Árbir quımada arnaıy qorǵanysh elementteri bar: beti aınadaı tegis, mıkromátin jazylǵan jáne qyry bederli.
Quımalar arnaıy qaptamamen shyǵarylady, ol sapa sertıfıkaty da bolady jáne quımalardy mehanıkalyq zaqymdanýdan qorǵaıdy.
Biregeı qorǵanysh qaptamasy onyń ashylǵanyn nemese ashylmaǵanyn ońaı anyqtaýǵa múmkindik beredi. Klıent ýltrakúlgin sáýle arqyly qorǵanysh qaptamasynyń túpnusqalyǵyn ońaı teksere alady. Ýltrakúlgin sáýleni túsirgende ashylmaǵan qaptamada lıýmınestsentti jazýlar móldir tereze arqyly paıda bolady, qaptama ashylǵan jaǵdaıda ózgeredi. Quımalardy tutas qorǵanysh qaptamasynda saqtaý usynylady.
Artyqshylyǵy nede?
- ótimdiligi joǵary
- salymnyń uzaqmerzimdi túri
- ınflıatsııa men ekonomıkalyq daǵdarystardan qorǵaıdy
- klıentke «sol kúni» aqsha tóleı otyryp, keri satyp alý (qorǵanysh qaptamasynyń tutastyǵy saqtalǵan jaǵdaıda) kepildendirilgen.
Qaıdan alýǵa jáne satýǵa bolady?
Qazirgi ýaqytta ólshengen altyn quımalardy Halyk Bank, Eýrazııalyq Bank, Jusan Bank pen Bank TsentrKredıtten, sondaı-aq bankke jatpaıtyn keı aıyrbastaý pýnkterinen satyp alýǵa jáne qaıtadan satýǵa bolady.
Shetelge shyǵarýǵa bola ma?
Prezıdenttiń №830 Jarlyǵyna sáıkes, Qazaqstan Respýblıkasynyń Ulttyq Banki shyǵaratyn affınırlengen altynnyń 5, 10, 20, 50 jáne 100 grammdyq altyn quımalaryn, sondaı-aq massasy 100 gramnan asatyn affınırlengen altyndy shetelge shyǵarýǵa tyıym salynady.
Qalaı saqtaý kerek?
Árbir ólshengen quıma arnaıy qaptamada satylady. Saqtaý kezinde osy qaptamany ashpaǵan jón. Sebebi, qaptama onyń sapa sertıfıkaty retinde de sanalady. Onyń ashylǵany nemese ashylmaǵany ońaı anyqtalady.
Qaptama ashylmasa, ekinshi deńgeıli bankter altyn quımany uzaq tekseristen ótkizbeı-aq satyp alýǵa mindetti bolady.
Salyq salyna ma?
Ulttyq Bank shyǵaratyn ınvestıtsııalyq quraldarǵa (altynnan jasalǵan ınvestıtsııalyq monetalar jáne tazartylǵan altynnyń ólsheýli quımalary) qosylǵan qun salyǵy salynbaıdy.
Qaı altyn quımalary ótimdi?
2024 jylǵy 1 jeltoqsandaǵy derekke saı, quıma satyp alýshylar arasyndaǵy suranys:
- 10 grammdyq altyn, onyń jalpy satý kólemindegi úlesi – 51 958 dana nemese 24%
- 100 gramdyq quıma - 47 794 dana nemese 22%
- 5 gramdyq quıma - 47 584 dana nemese 22%
- 20 gramdyq quıma - 38 603 dana nemese 18%
- 50 gramdyq quıma - 29 555 dana nemese 14%.
Aıta keteıik, buǵan deıin altyn quımaǵa ınvestıtsııa salarda neni eskerý keregin jazǵan edik.
– Altynǵa ınvestıtsııa salǵan kezde, altyn baǵasy ózgerip otyratynyn, ıaǵnı ósýi de, túsýi de múmkin ekenin este ustaǵan jón. Demek, ınvestıtsııalaýdyń kez kelgen túri sııaqty, altynǵa baılanysty ınvestıtsııalarda da tolyqqandy eskerilýi qajet táýekelder bar, - delingen Ulttyq banktiń jaýabynda.
Ulttyq bank kún saıyn 1 gramm altynnyń baǵasyn jarııalap otyrady. Ondaǵy derekterge súıensek, keıingi 3 aıda altyn baǵasy 4 myń teńgege jýyq ósken.
Sondaı-aq, Ulttyq bank el azamattary búginge deıin qansha altyn quımasyn satyp alǵanyn málimdegen bolatyn.
Atap aıtqanda, 2025 jylǵy 1 qańtardaǵy derekke saı, Ulttyq Bank ekinshi deńgeıli bankter men bankke jatpaıtyn aıyrbastaý pýnkterine jalpy salmaǵy 6,8 tonna ólshengen quıma satqan. Satý jáne qaıta satyp alý tártibi bankter jáne aıyrbastaý pýnktterimen jasalǵan shart arqyly retteledi.