«Sınaloa» esirtki karteliniń basshysy ómir boıyna bas bostandyǵynan aıyryldy
ASTANA.KAZINFORM - Meksıkalyq «Sınaloa» karteliniń negizin qalaýshy Ismael «El-Maıo» Zambadaǵa Nıý-Iork federaldy soty ómir boıyna bas bostandyǵynan aıyrý jáne 15 mıllıard dollar aıyppul tóleý úkimin shyǵardy, dep habarlaıdy NBC News.
Ol AQSh-taǵy kokaın, fentanıl jáne metamfetamın kontrabandasymen aınalysatyn álemdegi eń iri esirtki uıymdarynyń birine, sondaı-aq reketke jáne basqa da birqatar qylmysqa basshylyq jasaǵanyn moıyndady. Sot otyrysynda Zambada keltirilgen zalal úshin keshirim surap, óz áreketteri úshin jaýapkershilikti moınyna alatynyn málimdedi.
Tergeý Zambadanyń Hoakın «El Chapo» Gýsmanmen ondaǵan jyldar boıy AQSh-qa kontrabandalyq jolmen esirtki tasymaldaǵan «Sınaloa» kartelin basqarǵanyn, jyl saıyn júz mıllıon dollarlap tabys tapqanyn jáne meksıkalyq sheneýnikterge para bergenin anyqtady.
Gýsmannyń ózi 2019 jyly AQSh-ta ómir boıyna bas bostandyǵynan aıyryldy.
Zambadanyń ómir boıy bas bostandyǵynan aıyrylýy - kartel kósemin ustaý boıynsha jyldar boıy júrgizilgen jumystyń jemisti nátıjesi boldy.
Ol 2024 jyly Meksıkada ustalyp, Tehasqa ákelingennen keıin qamaýǵa alyndy.
Buǵan deıin Grýzııada esirtki qylmysyna qatysy bar 120-dan astam adam ustalǵan bolatyn.
