Synaq merziminde jalaqyny azaıtýǵa bola ma: qyzmetkerler neni bilýi kerek
ASTANA. KAZINFORM — Jumysqa ornalasqan kezde synaq merziminen ótý — qalypty tájirıbe. Alaıda keıbir jumys berýshiler osy kezeńdi syltaýratyp, qyzmetkerdiń jalaqysyn azaıtýy nemese ony jumystan op-ońaı shyǵara salýy múmkin. Eńbek zańnamasynda mundaı jaǵdaılarǵa qatysty naqty talaptar bar. QR Eńbek jáne halyqty áleýmettik qorǵaý mınıstrligi synaq merzimindegi qyzmetkerlerdiń qandaı quqyqtary bar ekenin eske saldy.
Synaq merzimi eńbek shartynda kórsetilýi kerek
Jumys berýshi qyzmetkerdiń kásibı biliktiligin jáne tapsyrylǵan jumysty atqara alý qabiletin baǵalaý úshin synaq merzimin belgileı alady. Biraq bul talap eńbek shartynda mindetti túrde jazylýy kerek.
Eger eńbek shartynda synaq merzimi týraly talap bolmasa, qyzmetker synaq merziminsiz jumysqa qabyldanǵan bolyp esepteledi.
Ádette synaq merzimi úsh aıdan aspaýǵa tıis. Alaıda uıym basshylary men olardyń orynbasarlaryna, bas býhgalterler men olardyń orynbasarlaryna, sondaı-aq fılıaldar men ókildikterdiń basshylaryna alty aıǵa deıin synaq merzimi belgilenýi múmkin.
Synaq merziminde qyzmetkerdiń qandaı quqyǵy bar?
Synaq merzimi qyzmetkerdiń eńbek quqyqtaryn shektemeıdi. Ol jumysqa kirisken alǵashqy kúnnen bastap zańda kózdelgen negizgi quqyqtar men kepildikterge ıe bolady.
Atap aıtqanda, qyzmetkerdiń:
-
jalaqysyn ýaqytyly ári tolyq kólemde alýǵa;
-
belgilengen jumys ýaqyty men demalys tártibiniń saqtalýyna;
-
qaýipsiz eńbek jaǵdaıynda jumys isteýge;
-
eńbek zańnamasynda qarastyrylǵan áleýmettik kepildikterdi paıdalanýǵa;
-
eńbek quqyqtary men zańdy múddelerin qorǵaýǵa quqyǵy bar.
Synaq merziminde jalaqyny azaıtýǵa bola ma?
Joq. Synaq merziminiń belgilenýi qyzmetkerdiń jalaqysyn azaıtýǵa negiz bola almaıdy.
Eńbekaqy mólsheri eńbek shartynda kórsetiledi jáne zań talaptaryna sáıkes bolýy kerek. Mysaly, azamat jumysqa úsh aılyq synaq merzimimen qabyldansa, jumys berýshi onyń synaqtan ótip jatqanyna silteme jasap, jalaqysyn óz betinshe tómendete almaıdy.
Eńbekaqy mólsherin ózgeshe belgileý úshin zańdy negiz bolýy jáne bul talap eńbek shartynda kórsetilýi qajet.
Synaqtan óte almaǵan qyzmetkerdi jumystan shyǵarýǵa bola ma?
Synaq nátıjesi boıynsha jumys berýshi qyzmetkerdiń tapsyrylǵan jumysqa sáıkes kelmeıdi degen qorytyndyǵa kelse, eńbek shartyn zańda belgilengen tártippen buza alady.
Alaıda ol qyzmetkerge eńbek shartyn buzatynyn aldyn ala habarlap, synaq nátıjesiniń nelikten qanaǵattanarlyqsyz dep tanylǵanyn túsindirýge mindetti.
Demek, jumys berýshi synaq merziminde júrgen qyzmetkerdi óz qalaýynsha, eshqandaı sebep túsindirmesten jáne zańda belgilengen tártipti saqtamaı jumystan shyǵara almaıdy.
Eńbek shartyn muqııat oqyǵan jón
Mınıstrlik synaq merzimi resmı eńbek qatynastarynyń bir bóligi ekenin eske salady. Sondyqtan osy kezeńde de qyzmetkerdiń eńbek quqyqtary men zańda kózdelgen kepildikteri tolyq saqtalýǵa tıis.
Jumysqa ornalasar aldynda eńbek shartyn muqııat oqyp, ásirese synaq merziminiń uzaqtyǵyna, jalaqy mólsherine jáne eńbek jaǵdaılaryna qatysty talaptarǵa nazar aýdarý qajet.
Eske salaıyq, munyń aldynda jumysqa keshikken qyzmetkerdiń jalaqysynan aıyppul ustaýǵa bola ma, joq pa — sony jazǵan edik.
